Թեյլոր Սվիֆթի հինգերորդ՝ «1989» ստուդիային ալբոմը համացանցում է հայտնվել դրա պաշտոնական թողարկումից երեք օր առաջ, որը նշանակված էր հոկտեմբերի 27-ին: ԶԼՄ-ների տվյալներով՝ ցանցահենային ֆայլը տեղադրվել է ֆրանսիական սերվերում: Երգչուհու զայրացած երկրպագուները կոչ են անում չներբեռնել գողացած երգերը՝ գրում է Spletnik.ru-ն:
Արևմտյան մամուլի հաղորդմամբ՝ սկզբում YouTube-ում հայտնվել է Blank Space թրեքը: Մի քանի ժամ անց Սվիֆթի ձայնագրման Big Machine Records լեյբլը հեռացրել է այն: Ցանցահենները ընդհանուր առմամբ գողացել են 19 երգ, որոնցից մի քանիսը նախատեսված են եղել Target Edition էքսկլյուզիվ թողարկման համար: Target-ը խանութների ցանց է, որտեղ առաջինն են սկսվում վաճառվել Սվիֆթի սկավառակները:
Նշենք, որ 24-ամյա երգչուհին փորձում է հանգստություն պահպանել:
«Ես նույնիսկ չեմ էլ ուզում խոսել այդ մասին: Ես տեխնոլոգիաներին չեմ վստահում: Ես չեմ ուզում խոսել արտահոսքի մասին: Դա ինձ հավասարակշռությունից հանում է: Ես կտապալեմ ելույթներս»,- ասել է նա:
Օրերս երգչուհին անձամբ նոր սկավառակից երկու սինգլներ է կատարել Ջիմմի Քեմելի շոուի 15-հազարանոց հանդիսատեսի առջև: Դրանից բացի՝ նա ավելի վաղ ներկայացրել է Welcome To New York երգը և Instagram-ում տեղադրել հատվածներ որոշ թրեքների տեքստերից:
Ներկա պահին «1989» ալբոմը դեռ տեղադրված է Tumblr սերվիսի անանուն էջում: Բավական է միայն ճիշտ գաղտնաբառ հավաքել: