«Իրաքի և Շամի իսլամական պետության» (ԴԱԻՇ) գրոհայինները Բաղդադից հյուսիս ուղղությամբ գրոհի ընթացքում օգտագործել են պայթուցիկ, որը պարունակում է թունավորող քլոր։ Դրա հետևանքով տուժել են 25 զինվորական և խաղաղ բնակիչներ։ Այս մասին հաղորդում է The Wall Street Journal-ը՝ հղում անելով տեղի իշխանություններին։
Միջադեպը տեղի է ունեցել սեպտեմբերի 5-ին Իրաքի մայրաքաղաքից ոչ հեռու գտնվող Դուլույա քաղաքի վրա հարձակման ժամանակ։ Պաշտոնյաները նշում են, որ քլորով թունավորումը չի հանգեցրել լուրջ հետևանքների ու վնասվածքների։
Դուլույայի ոստիկանության պետի տեղեկությամբ՝ բժշկական հետազոտությունները ցույց են տվել, որ պայթուցիկի մեջ քլոր է պարունակվել։ Պետի խոսքերով՝ տուժածների մոտ ի հայտ է եկել հազ, փսխում և շնչարգելություն։