Մինչև տարեվերջ Հայաստանը ԵՄ-ի հետ կհստակեցնի այն ոլորտները, որոնցում շարունակվելու է համատեղ աշխատանքը: Այսօր մի շարք լրատվամիջոցների ներկայացուցիչների հետ զրույցում այս մասին ասաց ՀՀ էկոնոմիկայի նախարարի առաջին տեղակալ Գարեգին Մելքոնյանը՝ պատասխանելով հարցին, թե ի վերջո ե՞րբ է Հայաստանն իր առաջարկների փաթեթը ներկայացնելու Եվրոպական միությանը՝ շարունակելու այդ միության հետ քաղաքական մակարդակի հարաբերությունները:
Նախարարի տեղակալը նշեց, որ Հայաստանը մինչև տարեվերջ եվրոպացի գործընկերների հետ ունի որոշակի քննարկումներ, որի նպատակը պետք է լինի հստակեցնել այն ոլորտներն ու ուղղությունները, որոնցում կողմերը շարունակելու են իրենց համատեղ աշխատանքը, որը կբերի Հայաստան-ԵՄ հետագա աշխատանքի ավելի հստակ ուղղությունների, ոլորտների, ձևաչափերի մանրամասների և այլն, և այլն:
Չցանկանալով բացել շատ փակագծեր՝ Գարեգին Մելքոնյանը նշեց, որ առաջիկա ամիսների ընթացքում այս առումով աշխատանքներ և քննարկումներ կլինեն: «Կարծում եմ, որ մենք կգանք որոշակի այն ոլորտների, ուղղությունների հստակեցմանը, որտեղ կշարունակենք մեր աշխատանքները»,- ասաց նախարարի առաջին տեղակալը:
Դիտարկմանը, թե ինչո՞ւ է այս հարցը ձգձգվել շուրջ մեկ տարի, և ինչո՞ւ Հայաստանն իր առաջարկները չի ներկայացրել ավելի վաղ, գուցե ԵՏՄ անդամակցության գործընթացի անորշությա՞ն պատճառով, նախարարի առաջին տեղակալն արձագանքեց՝ ասելով, որ այս երկու գործընթացները միմյանց հետ չէր կապի: Թեև, ըստ նրա, ինչ-որ առումով կապակցվածություն կարելի է տեսնել:
«Կան որոշակի ոլորտներ և ուղղություններ, որտեղ դիտարկում ենք, թե հետագայում ինչպիսի համագործակցության հեռանկար և ձևաչափ է պետք հստակեցնել: Այդ առումով մենք պետք է դիտարկենք մեր պարտավորությունները, եղած հնարավորությունները, մոտեցումները հետագա համագործակցության հարցի շուրջ: Ժամկետի առումով ես անմիջականորեն չէի կապի, բայց ընդհանուր առմամբ բնականաբար այդ ամենը պետք է դիտարկել մեկ միասնական համատեքստում՝ ինչ-որ առումով դիտարկելով նաև տարբեր տեսանկյուններից: Բայց նաև նշեմ, որ վերջին մեկ տարվա ընթացքում ԵՄ-ի հետ մեր ունեցած աջակցության գործիքները շարունակվում են իրականացվել»,- ասաց Գարեգին Մելքոնյանը:
Ըստ նրա՝ այս տարի բացել են մեկ Թվինիգ ծրագիր, այսօր բացվեց հերթական ծրագիրը, մեկ այլ ծրագիր կսկսվի Վիճակագրության պետական ծառայությունում, TAEX ծրագրով ևս կան նոր զարգացումներ: Մելքոնյանն ընդգծեց, որ ԵՄ-ի կողմից իրականացվող ծրագրերի մասում վերջին տարվա ընթացքում նույնպես շարունակվել են ծրագրեր, թեև ոլորտների և ուղղությունների նոր շեշտադրումների կարիք կա, որովհետև օրակարգը հստակեցվում և ինչ-որ չափով փոփոխվում է, բայց այնուամենայնիվ աջակցության որևէ ծրագիր, գործիք չի ընդհատվել:
«Առաջիկա ամիսների ընթացքում քննարկումների արդյունքները մենք Ձեզ կներկայացնենք»,- ասաց ՀՀ Էկոնոմիկայի նախարարի առաջին տեղակալ Գարեգին Մելքոնյանը:
Առաջարկում ենք մանրամասներին ծանոթանալ տեսանյութի միջոցով:
Հիշեցնենք, որ անցյալ տարի՝ սեպտեմբերի 3-ից հետո, երբ ՀՀ նախագահ Սերժ Սարգսյանը հայտարարեց, որ Հայաստանը միանում է Եվրասիական ինտեգրացիոն նախագծերին, Հայաստան-ԵՄ հարաբերությունների օրակարգն անորոշ է: Ու թեև Հայաստանն ամենաբարձր՝ ՀՀ նախագահի մակարդակով հայտարարել է, որ ցանկանում է շարունակել ԵՄ-ի հետ քաղաքական մակարդակի հարաբերությունները, ցանկություն է հայտնել ստորագրել Ասոցացման համաձայնագիրը՝ առանց ԽՀԱԱԳ պայմանագրի, ԵՄ-ին չի ներկայացրել այն ոլորտները, որոնցում Հայաստանը կարող է շարունակել ԵՄ-ի հետ համագործակցությունը, քանի որ առաջիկայում Հայաստանը ՄՄ անդամակցության դեպքում ունենալու է միջազգային պարտավորություններ, որոնք անհամատեղելի են ԵՄ ԱՀ/ԽՀԱԱԳ-ի հետ: