ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿ-ն այսօր իր հաճախորդներին ներկայացրեց իր նորույթը՝ «ԱԿԲԱ բիզնես Փարթնր» ենթաբրենդը, որի ստեղծման նպատակը բանկի հաճախորդ հանդիսացող իրավաբանական անձանց սպասարկմանն ուղղված բոլոր բանկային պրոդուկտները մեկ տանիքի ներքո մեկտեղելն է: Բանկը փոքր ու միջին բոլոր ձեռնարկություններին «ԱԿԲԱ բիզնես Փարթնր» ենթաբրենդի ներքո առաջարկում է մասնակցել «Դարձիր գործընկեր» արշավին, որը մեկնարկել է սեպտեմբերի 28-ից ու տևելու է մինչև դեկտեմբերի 12-ը: Այս մասին լրագրողների հետ հանդիպմանը տեղեկացրեց ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿ-ի գլխավոր գործադիր տնօրենի տեղակալ Նիկոլայ Հովհաննիսյանը:
Բանախոսի խոսքով՝ դեռ անցած տարվանից բանկն իր առջև խնդիր էր դրել մարդկանց մոտ փոխել պատկերացումներն այն մասին, թե բանկը միայն գյուղատնտեսական վարկեր է տրամադրում է, ինչի պատճառով էլ հենց ստեղծվել է «ԱԿԲԱ բիզնես Փարթնր» ենթաբրենդը:
««ԱԿԲԱ բիզնես Փարթնրը» պրոդուկտ չէ, այն ենթաբրենդ է, որի մեջ ամփոփվում են տարբեր պրոդուկտներ, միջոցառումների ու առաջարկությունների մի ամբողջություն, որն առաջարկելու ենք մեր իրավաբանական անձ հանդիսացող հաճախորդներին»,- հայտնեց բանախոսը՝ հայտարարելով ենթաբրենդի ներկայացման լայնամասշտաբ արշավ սկսելու մասին:
Ներկայացնելով ենթաբրենդի առավելությունները՝ վերջինս նշեց՝ այն մարդիկ, որոնք կորոշեն մինչև դեկտեմբերի 12-ը այլ բանկերից տեղափոխվել ԱԿԲԱ ԿՐԵԴԻՏ ԱԳՐԻԿՈԼ ԲԱՆԿ, նրանց կառաջարկվի ստանալ նոր բիզնես-վարկ գործող վարկերի նվազագույն տոկոսադրույքից մինչև 30 տոկոս ավելի ցածր տոկոսադրույքով՝ առաջին տարվա համար, ու 3 տոկոս տոկոսադրույքով ավելի ցածր՝ հաջորդ յուրաքանչյոր տարվա համար:
Իսկ այն հաճախորդները, որոնց պահանջարկը կլինի մինչև 14 մլն դրամի սահմաններում, կառաջարկվի «վարկ պլյուս մեկ» պրոդուկտը, որի տրամադրման որոշումը կկայացվի մեկ ժամվա ընթացքում, այսինքն՝ մարդը, որը ցանկանում է գալ մեզ մոտ, հստակ կիմանա իր վարկի տոկոսը:
«Կառաջարկենք անվճար հաշվի բացում, կտրամադրենք 12 ամիս անվճար ակբա օնյալն, 12 ամիս անվճար բիզնես-քարտ ու կից ԱԿԲԱ մաքսային քարտ՝ ևս անվճար, և ամենակարևորը՝ յուրաքանչյուր հաճախորդ կունենա իր անհատական սպասարկող խորհրդատուն»,- եզրափակեց բանախոսը: