ՄԱԿ-ի գլխավոր քարտուղար Պան Գի Մունն Արևմուտքի իշխանությունների ուշադրությունը հրավիրել է այն բանին, որ Ուկրաինայում ճգնաժամի ռազմական լուծում գոյություն չունի: Այս մասին հայտնում է Agence France-Presse-ը:
Պան Գի Մունի խոսքը հետևել է ՆԱՏՕ-ի գլխավոր քարտուղար Անդերս Ֆոգ Ռասմուսենի հայտարարությանը՝ Արևելքում դաշինքի առաջադեմ օպերատիվ բազաներ ստեղծելու մասին: Ավելի վաղ Ռասմուսենը հիշեցրել է, որ ՆԱՏՕ-ն մտադիր է դաշինքի արձագանքման ուժերի ներսում ուժեղացված ռազմական պատրաստվածությամբ մի քանի հազարանոց խումբ ստեղծել: Նա նաև նշել է, որ դրա համար անհրաժեշտ կլինի համապատասխան ենթակառուցվածք ստեղծել:
«Կարևոր է, որ նրանք հասկանան՝ այդ իրավիճակում ռազմական լուծում չկա: Քաղաքական լուծման համար քաղաքական երկխոսություն է պետք, դա ավելի ռացիոնալ ճանապարհ է»,- ասել է Պան Գի Մունը: Նա նաև նշել է, որ անհանգստացած է Ուկրաինայում տեղի ունեցող իրադարձություններով, և կուզենար խուսափել ճգնաժամի հետագա սրումից, որը «վերածվում է շատ քաոսային և վտանգավոր իրավիճակի»:
«Դա տարածաշրջանային և նույնիսկ գլոբալ հետևանքներ ունի: Հենց այս պատճառով միասին նստելու և այս հարցը խաղաղ ճանապարհով՝ երկխոսության միջոցով լուծելու առաջարկով ես դիմում եմ ուկրաինական և ռուսական իշխանություններին»,- ասել է նա լրագրողներին Նոր Զելանդիա այցի ժամանակ: