ՀՀ նախկին վարչապետ, Ազգային Ժողովի պատգամավոր Հրանտ Բագրատյանն Aravot.am-ի հետ զրույցում, անդրադառնալով 2-րդ նախագահ Ռոբերտ Քոչարյանի՝ իշխանության վերադառնալու հնարավորություններին, նկատել է, որ Քոչարյանի «շանսերը» թույլ են, եթե, իհարկե, խոսքը ազնիվ ընտրությունների մասին է: «Չեմ կարող խոսել հասարակության փոխարեն, որովհետև նրա անդամների մի մասը փողը վերցնում և քվեարկում է։ Ի դեպ այդ գործելակերպը Հայաստանում ներդրվել է Քոչարյանի կողմից»,-կարծիք է հայտնել պարոն Բագրատյանը։
Պարոն Բագրատյանի ներկայացմամբ՝ դեռևս 2006 թվականին «Forbes» ամսագիրը նրան ընդգրկեց Հայաստանի հարուստ մարդկանց ցանկի մեջ, իսկ ԱՊՀ մի շարք հրատարակչություններ նրան միլիարդատեր են համարում։ Հենց Քոչարյանն էլ, ինչպես ասաց ԱԺ պատգամավորը, առիթը բաց չի թողնում իր տղաներին խոշոր բիզնեսմեն ներկայացնելու. «Բայց այդ փողը ո՞րտեղից։ Հասարակությունը Քոչարյանից բացատրություններ չի ստացել։ Իբրև նախագահ՝ նա բարոյապես պարտավոր էր պատասխանել ամեն մի հարցի։ Օրինակ՝ ի՞նչպես է Սևան-Հրազդան կասկադը, 900 մեգավատ՝ Հայաստանի և աշխարհի հրաշալիքներից մեկը, շուրջ 3,5 միլիարդ դոլարով, այսինքն՝ ձրիբար օտարվել։ Ի՞նչու է իրանական գազամուղը կառուցվել ուշ և բարակ տրամագծով։ Հավատացեք սրանք ավելի վատ գործարքներ են, քան 2013-ի դեկտեմբերի 2-ի համաձայնագիրը՝ «Հառուսգազարդի» (ներկայումս՝ «Գազպրոմ-Արմենիա»- Ն. Բ.) մասով։ Հենց սրանց պատճառով է այսօր մեր քաղաքացին 41.85 դրամ տալիս հոսանքի համար, սպառում շատ թանկ գին ունեցող գազ։ Կամ այդ ո՞նց եղավ, որ Քաջարանը (նկատի ունի Քաջարանի պղնձամոլիբդենային կոմբինատը, Ն.Բ.) վաճառվեց առանց փողի։ Այո, առանց փողի։ Դրա համար չեն վճարել։ Հետո, շահույթ ստանալուն զուգահեռ մի քանի կոպեկ վճարել են պետությանը. սա էլ Հայաստանի նավթն է։ Ադրբեջանն իր հանրային ռեսուրսի նկատմամբ ավելի ազնիվ եղավ, այն օֆշորային ընկերության չտվեց։ Քոչարյան, փայ ունե՞ս Քաջարանում։ Այո՞, թե՝ ոչ։
Մանրամասները՝ aravot.am-ում