Օհայո նահանգի համանուն գետ 16,7 տոննա դիզելային վառելիք է լցվել: ITAR-TASS-ի տեղեկացմամբ՝ այս մասին երեքշաբթի օրը հայտարարել է նահանգի Ցինցինատի քաղաքի ղեկավար Ջոն Քրենլին:
Նրա խոսքով՝ թունավոր վառելանյութի արտահոսքը տեղի է ունեցել Duke Energy ընկերությանը պատկանող էլեկտրակայանում վթարի հետևանքով, որը գտնվում է Նյու Ռիչմոնդ քաղաքից 32 կմ հարավ-արևելք:
«Դիզելային վառելիքն ընկել է Օհայո գետը, ինչի հետևանքով կարմրավուն բծեր են առաջացել,- ասել է ԱՄՆ շրջակա միջավայրի պահպանության գործակալության աշխատակից Սթիվեն Ռենինգերը:- Վառելիքն առավել շատ կուտակվել է գետի հոսանքով մի քանի կմ ներքև»:
Նահանգի իշխանությունները պնդում են, որ մոտակա քաղաքների բնակիչներին, որոնք օգտագործում են Օհայո գետի ջուրը, ներկայումս ոչինչ չի սպառնում: Քաղաքապետ Քրենլին հատուկ մամլո ասուլիսի ժամանակ ծորակից մի բաժակ ջուր է խմել՝ բնակիչներին ցույց տալու համար, որ այն վտանգավոր չէ: «Մեր խմելու ջուրն անվնաս է և կմնա այդպիսին»,- նշել է նա:
Duke Energy ընկերությունն ԱՄՆ-ում խոշորագույն էլեկտրաէներգիա արտադրողն է:
