«Ես պաշտոնապես հայտարարում եմ, որ մոտակա ժամանակներս տրանսպորտային ոլորտում թանկացումներ չեն լինելու»,- այսօր Ավան վարչական շրջանում շրջայցից հետո պատասխանելով «Առաջին լրատվական»-ի հարցին՝ ասաց Երևանի քաղաքապետ Տարոն Մարգարյանը՝ հավելելով. «Սակագինն առայժմ չի թանկանա, քանի որ ստեղծված է հանձնաժողով, ներգրավված են մասնագիտացված միջազգային կառույցներ, որոնք իրականացնում են մոնիտորինգ և քննարկումներ:
Այդ ուղղությամբ հաշվարկներ են կատարվում, և մինչև մենք չունենանք վերջնական արդյունք, թե մեկ կամ երկու տարի հետո ինչ որակ ենք ակնկալում տրանսպորտից, անվտանգության ինչ երաշխիքներ ենք ունենալու տրանսպորտային ոլորտից, մենք չենք գնալու այդ քայլին: Մեր հանրությունը, երևանցին տեղյակ կլինի ամեն ինչից: Ոչ մի բան գաղտնի չի արվելու, և փորձելու ենք այս ոլորտին միասնական քաղաքային ուժերով լուծում տալ»:
Տարոն Մարգարյանը «Առաջին լրատվական»-ի խնդրանքով անդրադարձավ նաև բնակելի շենքերի առաջին և նկուղային հարկերում տեղակայված զվարճանքի վայրերի՝ դիսկոտեկների, բարերի ու կարաոկեների գործունեությանը: Քաղաքապետի խոսքով՝ իր համար ևս ընդունելի չէ, որ բազմաբնակարան շենքերի առաջին հարկերում գիշերային ակումբների նման հաստատություններ են տեղակայված:
«Երեք տարի առաջ քաղաքապետարանի նախաձեռնությամբ օրենսդրական նախագիծ ներկայացվեց կառավարություն, հետո ԱԺ: Հիմա մենք քննարկումների մեջ ենք, և ես կողմնակից եմ, որ նման հաստատությունները տեղակայվեն բնակելի շենքերից հեռու»,- ասաց Մարգարյանը՝ հավելելով, որ այս ընթացքում իրենք իրականացնում են հսկողություն, որ այդ հաստատությունները չաշխատեն թույլատրելի ժամից հետո:
Մեր դիտարկմանը՝ այդ դեպքում ինչպե՞ս է պատահում, որ այդ հաստատությունները գործում են 24 ժամ, քաղաքապետը նկատեց. «Վերջին շրջանում 32 նման օբյեկտ է փակվել քաղաքացիների դժգոհության, հասարակական կարգը խախտելու համար: Եթե մեկ բնակչի բողոք եղավ, համոզված եղեք, որ այդ հաստատությունը փակվելու է: Իսկ օրենքն ընդունվելուց հետո նոր չափորոշիչներ կլինեն, որ այդ օբյեկտները 50-100 մետր հեռավորության վրա լինեն»:
