«Մարզահամերգային համալիր» ՓԲԸ-ի փաստաբան Արմինե Հակոբյանը դիմել է ՀՀ Գլխավոր դատախազին՝ բողոքելով դատական ակտերի հարկադիր կատարման ծառայության աշխատակիցների կողմից երեկ իրեն գաղտնի տեսանկարահանելու համար:
Հիշեցնենք, որ երեկ ԴԱՀԿ աշխատակիցները մեծ խմբով ներխուժել էին համալիրի տարածք և գույքագրում էին անում ու կնքում շենքի դռները՝ տարածքից վտարելով աշխատակիցներին: ԴԱՀԿ աշխատակիցները, սակայն, շենքի լիազոր ներկայացուցիչներին վտարման որևէ որոշում չէին ներկայացրել: Սակայն ավելի ուշ ԴԱՀԿ-ը հաղորդագրություն տարածեց, թե իրենք պատշաճ ծանուցել են կողմին իրենց գործողությունների մասին՝ հաղորդագրությանը կցելով մի անորակ տեսագրություն, որից պարզ է դառնում, որ ԴԱՀԿ աշխատակիցները փաստաբանին ինչ-որ թղթեր են տրամադրում:
«Ես ավելի ուշ եմ տեղեկացել, քան կսկսվեին ԴԱՀԿ-ի կողմից այդ ապօրինի գործողությունները: Երբ ես հասա ընկերություն, ինձ ընդհանրապես որևէ փաստաթուղթ չի ներկայացվել, վտարման որևէ որոշում այդ պահին, իմ կարծիքով, չի եղել: Այդ թղթերին ես ծանոթացել եմ, երբ արդեն բոլոր գործողություններն ավարտվել էին, իսկ դռները կնքված էին՝ ժամը 19:30-20:00-ի սահմաններում»,- ասաց Հակոբյանը՝ հավելելով, որ օպերատիվ-որոնողական գործողությունների մասին ՀՀ օրենքի համաձայն՝ գաղտնի, առանց անձին տեղեկացնելու տեսանկարահանելու իրավունք ունեն միայն համապատասխան մարմինները՝ բացառությամբ ԴԱՀԿ-ի:
«ԴԱՀԿ աշխատակիցների կողմից ինձ տեսանկարահանելու գործողությունների մեջ առկա են հանցագործության հատկանիշներ: Այս հայտարարությունը կարող է դիտվել որպես հանցագործության մասին հաղորդում, թեպետ ես արդեն գրավոր դիմել եմ գլխավոր դատախազին»,- ասաց փաստաբանը:
