«Միջազգային իրադրությունը կտրուկ սրվում է, ինչը նշանակում է, որ հակառակորդ դարձած գլոբալ դերակատարներն իրենց կրտսեր դաշնակիցների զորակոչ են հայտարարելու և պահանջելու են հավատարմության հստակ ու առարկայական հավաստիացումներ ներկայացնել: Այս համատեքստում Մադրիդյան սկզբունքների նկատմամբ բացասական դիրքորոշում բարձրաձայնելը կարևոր քայլ էր Արցախի կողմից»,- «Առաջին լրատվական»-ի հետ զրույցում նման տեսակետ հայտնեց ԼՂ նախկին արտգործնախարար Արման Մելիքյանը՝ անդրադառնալով Արցախի վարչապետ Արա Հարությունյանի այն հայտարարությանը, թե Մադրիդյան սկզբունքներն անընդունելի են Ղարաբաղի համար:
Արման Մելիքյանի խոսքերով՝ ներկա պայմաններում այս կարգի հայտարարությունը որոշակի երկվություն է մտցնում հայկական կողմերի դիրքորոշումների մեջ․ «Հայաստանի պաշտոնատարները մշտապես պնդել են, որ Մադրիդյան սկզբունքներն իրենց կողմից դիտարկվում են որպես հակամարտության կարգավորման համար ընդունելի բանակցային կանխադրույթներ: Այժմ, երբ պարզվեց, որ Հայաստանի արտաքին քաղաքականության համար ընդունելի Մադրիդյան սկզբունքներն ընդունելի չեն առնվազն Արցախի վարչապետի համար, հայկական կողմերի արտաքին քաղաքականությունը կարող է ավելի ճկուն դրսևորումներ ունենալ»:
Միաժամանակ ըստ Մելիքյանի՝ չի կարելի բացառել նաև որոշակի կադրային փոփոխությունների հեռանկարը․ «Քանզի չեմ կարծում, որ քաղաքական մոտեցումների այս ընդգծված տարբերությունը երկար պահպանվի՝ շուտով դրանց պաշտոնական ներդաշնակեցման կարիքը կրկին կարող է զգացվել, և այդ դեպքում նշված տարբերությունների խորհրդանիշը դարձած պաշտոնյաները, նոր քաղաքական կուրսի ներդրման անհրաժեշությունից ելնելով, գուցե ստիպված կլինեն հրաժեշտ տալ իրենց ներկայիս պաշտոններին»:
