Կասյան փողոցի վերին հատվածում՝ գյուղատնտեսական արտադրանքի շուկայում, գյուղացիները «Առաջին լրատվական»-ին հայտնեցին, որ առևտուրը նվազել է՝ այն պարզ պատճառով, որ երկրում մարդ չի մնացել: Իսկ քաղաքացիներն էլ ընդգծում էին, որ այս շուկայում գները մյուսներից չեն տարբերվում՝ կրկին թանկ է: Գյուղացիները, սակայն, չէին համաձայնում՝ ցույց տալով գյուղատնտեսական ապրանքների վրա փակցված գները. Վարունգը՝ 50-100 դրամ, դեղձը՝ 100-400 դրամ, սմբուկը՝ 150 դրամ, պղպեղը՝ 3 հատը 100 դրամ, խառը կանաչու մեկ կապոցը՝ 50 դրամ, մնացած ապրանքների գները ևս ավելի մատչելի էին՝ այլ շուկաների համեմատ: Կային փոքրաթիվ ապրանքատեսակներ, որոնց գները չէին տարբերվում, օրինակ՝ լոլիկինը և ձմերուկինը:
Թե մեզ, թե սպառողներին գյուղացիները մանրակրկիտ բացատրեցին, որ հողագործությամբ հազիվ են կարողանում իրենց ընտանիքը պահել, վարկեր ունեն, եղանակն էլ մյուս կողմից է անակնկալներ մատուցում, ապրանքի փոխադրումն էլ գումար արժե. չէ՞ որ տարբեր մարզերից են բերում: Բացի այդ, 24 ժամ իրենք հողի խնդիրներով են զբաղված, առավոտյան 6-ից «ջուր ու ցանք» են կատարում, իսկ ստացված բերքի վաճառքից հազիվ են կարողանում ընտանիք պահել ու վարկերը մարել:
Քաղաքացիներից մեկը, լսելով գյուղացիներին, ասաց. «Ի՞նչ եք մնացել այս երկրում, եթե մեղք եք՝ ջհանդամվեք Եվրոպա»: Գյուղացիները ոչինչ չասացին, միայն նկատեցին՝ միշտ էլ այդպես է. «Գյուղացին դառը դատում է, դատարկ նստում, մյուս կողմից էլ՝ այսպիսի անշնորհակալ մարդկանց հետ է ստիպված շփվում»:
Մանրամասն՝ տեսանյութում:
