«Ժողովուրդ»-ը գրում է` երեկ հայ ազգի հանճարեղ բանաստեղծի`Եղիշե Չարենցի մահվան օրն էր. ուղիղ 85 տարի առաջ նա իր մահկանացուն կնքեց այդպես էլ մինչև վերջ չբացահայտված հանգամանքներում: Հայաստանի վերջին տարիների քաղաքական կյանքում Եղիշե Չարենցը թերևս ամենաարդիական հայ դասականն էր` հատկապես 2008-ի համաժողովրդական շարժման օրերին: Սակայն առավել հիշարժանը, ինչ խոսք, նրա «Մահվան տեսիլ» բանաստեղծությունն էր` Հայ ազգային կոնգրեսի առաջնորդ Լևոն Տեր-Պետրոսյանի կատարմամբ.
Թող ո՜չ մի զոհ չպահանջվի ինձնից բացի,
Ուրիշ ոտքեր կախաղանին թող մոտ չգան,
և թող տեսնեն իմ աչքերի մեջ կախվածի,
Իմ բո՛րբ երկիր, լուսապսակ քո ապագան…
Թե ինչ եղավ դրանից հետո, և ով եղավ զոհը, հայտնի է բոլորին: Ընդամենը երկու ամիս հետո կայանալիք նախագահական ընտրություններից առաջ այսօր արդեն ակնհայտ է, որ այդ զոհը հերթական անգամ եղավ խաբված ու հիսաթափված ժողովուրդը, որի` «լուսապսակ ապագայի» հավատքը կախաղանվեց: