Թուրքական «Zaman» թերթի փոխանցմամբ, նախագահ Աբդուլլահ Գյուլը հեռախոսազրույց է ունեցել Թուրքմենստանի նախագահ Գուրբանգուլի Բերդիմուհամեդովի հետ, ինչի ընթացքում կողմերը քննարկել են միջպետական հարաբերությունների զարգացման և տարածաշրջանային զարգացումների հետ կապված մի շարք խնդիրներ:
Ապա Գյուլը Բերդիմուհամեդովին հրավիրել է Թուրքիա` մասնակցելու ապրիլին Ստամբուլում կայանալիք ՄԱԿ-ի 4-րդ համաժողովին: Բերդիմուհամեդովն էլ իր հերթին է Գյուլին հրավիրել Թուրքմենստան: Երկու հրավերներն էլ ընդունվել են:
Նշվում է, որ 2010 թվականին Թուրքիայի ու Թուրքմենստանի միջև առևտրային շրջանառությունը, 2009 թվականի համեմատ, աճել է 30 տոկոսով: Ներկայիս դրությամբ, Թուրքմենստանում գործունեություն են ծավալել ավելի քան 600 թուրքական ընկերություններ, որոնք ներգրավված են երկրի սոցիալ-տնտեսական ոլորտում:
Հիշեցնենք, որ անցյալ տարվա ամռանը Թուրքիայի Էներգետիկ ու բնական ռեսուրսների նախարար Թաներ Յըլդըզն Անկարայում կայացած «Թուրքիա-Թուրքմենստան» միջկառավարական տնտեսական հանձնաժողովի նիստում հայտարարեց, որ Թուրքիան արդեն իսկ 1.3 միլիարդ դոլարի ներդրում է կատարել Թուրքմենստանում, իսկ այժմ թուրքական ընկերությունները Թուրքմենստանում իրագործում են ավելի քան 600 նախագծեր, որոնք գնահատվում են 17 միլիարդ դոլար: