Ճապոնիայի հարավային Կյուսյու կղզում տեղատարափ անձրևներից առաջացած ջրհեղեղների ու սողանքների հետևանքով առնվազն 18 մարդ է զոհվել: Նրանց մեծամասնությունը տարեց մարդիկ են: Եվս 8-ը համարվում են անհետ կորած:
Կումամոտո և Օիտա պրեֆեկտուրաներում ժամանակավորապես տարհանվել է 33 հազար ընտանիք: Մարդիկ տեղափոխվել են անվտանգ վայրերի մարզադահլիճներ, դպրոցներ և այլն: Կումամոտո քաղաքում մասամբ կամ ամբողջությամբ ավերվել է 70 տուն, ավելի քան 300 շինություններ լցվել են հեղեղաջրերով: Ջրհեղեղի հետևանքով 10 հազար ընտանիք մնացել է առանց էլեկտրականության, բջջային կապը խաթարված է, ջրատարները` տեղ-տեղ վնասված: Այս մասին տեղեկացնում է Itar-Tass-ը:
Անձրևները Կյուսյու կղզում աննախադեպ բնույթ են կրում: Կղզու հարավային հատվածում`Կագոսիմա օդանավակայանի շրջանում, այսօր մեկ ժամում գրանցվել են ավելի քան 100 մմ տեղումներ: Հինգշաբթի Ասո քաղաքում մեկ ժամում գրանցվել է ավելի քան 500 մմ տեղում, ինչը ռեկորդային ցուցանիշ է: