Քիչ առաջ մեկնարկեց ԲՀԿ 5-րդ համագումարը: ԲՀԿ նախագահ Գագիկ Ծառուկյանը դահլիճ մտավ Սերժ Սարգսյանի ուղեկցությամբ: Սա ուշագրավ է այն առումով, որ երեկվա ընթացքում ԲՀԿ-ն պետք է պատասխաներ՝ միանում է արդյոք Սերժ Սարգսյանին նախագահի առաջիկա ընտրություններում սատարելու հայտարարությանը, թե ոչ. և կոալիցիոն կուսակցությունները պետք է համապատասխան հայտարարություն ստորագրեին:
Դատելով ԲՀԿ համագումարին Սերժ Սարգսյանի ներկայությունից` ԲՀԿ-ն այսօրվա համագումարի ժամանակ դրական պատասխան է տալու:
ՀՀ հիմնը հնչելուց հետո սկսել է ցուցադրվել ԲՀԿ կենսագրության մասին տեսանյութ: Այնուհետեւ, ըստ օրակարգի՝ նախատեսված են ելույթները, բացի այդ, համագումարում ԲՀԿ ծրագրում նախատեսված է կատարել խմբագրական փոփոխություններ: Այսօր տեղի կունենան ԲՀԿ նախագահի, քաղաքական խորհրդի ու Վերստուգիչ հանձնաժողովի ընտրություններ:
ԲՀԿ համագումարին ներկա են խորհրդարանական բոլոր կուսակցությունների, այդ թվում՝ ընդդիմության ներկայացուցիչները: ՀՅԴ-ից այնտեղ են Արմեն Ռուստամյանն ու Հրանտ Մարգարյանը, «Ժառանգությունից»՝ Ստեփան Սաֆարյանը:
Ի դեպ, ուշագրավ է, որ կոալիցիոն գործընկեր ՕԵԿ-ից համագումարին ներկա էր միայն ԱԺ պատգամավոր Խաչիկ Հարությունյանը. այսինքն՝ ո՛չ ՕԵԿ նախագահ Արթուր Բաղդասարյանը, ո՛չ խմբակցության ղեկավար Հեղինե Բիշարյանը հարկ չէին համարել գալու համագումարին:
Ի դեպ, ԲՀԿ համագումարին ներկա չէր նաև Ռոբերտ Քոչարյանը:
