ԱԺ ԲՀԿ-ական պատգամավոր Վարդան Բոստանջյանը, պատասխանելով մեր հարցին, թե իր կարծիքով հոկտեմբերի 27-ի թիկունքում կայի՞ն արդյոք կազմակերպիչներ, նշեց. «Դրա հետեւում բոլոր կանգնածները պարզվեցին համապատասխան դատական պրոցեսի արդյունքում, եւ ուրիշ մարդկանց հակված չեմ տեսնելու»: Այնուամենայնիվ, կայի՞ն դրսից կազմակերպիչներ, նա ասաց. «Միգուցե, նաեւ… ընդհանրապես ցանկացած նման պրոցեսի թիկունքում միգուցե մարդիկ են կանգնած, բայց դրանից ոչինչ չի փոխվել: Միշտ գերակա մնում է առաջընթացը»: Մեր հարցին, թե ինչո՞ւ այս 11 տարիների ընթացքում այդպես էլ դատարկ մնաց Կարեն Դեմիրճյանի արձանի համար Մաշտոցի պողոտայում առանձնացված տարածքը, մի՞թե չէին կարող կանգնեցնել հուշակոթող, Բոստանջյանը նշեց, թե երեւի դա տեխնիկական խնդիրների հետ է կապված: Այնուամենայնիվ, ըստ նրա, մի շարք համալիրներ ու կառույցներ անվանվել են Դեմիրճյանի անունով, իսկ արձանն էլ մի օր կտեղադրվի:
