«Այսօր մեր խմբակցության առաջին նիստն էր, Ծառուկյանը ողջունեց, շատ բարձր տրամադրությամբ եկել ենք մանդատները ստանալու: Մենք ունենք անելիքներ օրենսդիր դաշտում: Ստացել ենք կես միլիոն ձայներ, ունենք շատ տրված խոստումներ, որոնք պետք է կատարենք՝ հանձնաժողովներում ունենալով նախագահներ, փոխնախագահներ»,- այսօր ԿԸՀ-ում մանդատը ստանալուց հետո լրագրողների հետ ճեպազրույցում հայտարարեց ԱԺ նախկին փոխնախագահ, ԲՀԿ պատգամավոր Սամվել Բալասանյանը՝ շեշտելով, որ ինքն անձամբ չի հավակնելու ԱԺ փոխնախագահի պաշտոնին, քանի որ դա քաղաքական պաշտոն է: Ս. Բալասանյանը կրկին հայտարարեց, որ ԲՀԿ-ն չի վերցնելու նաև գործադիրում նախարարների պորտֆելներ: Ըստ «ԱԺ կանոնակարգ» օրենքի՝ որպես ԱԺ երկրորդ խոշոր քաղաքական ուժ, ԲՀԿ-ին կտրվի հանձնաժողովների 4 նախագահների, 3 փոխնախագահների պաշտոններ, որոնցից չեն հրաժարվելու:
«Ես երբեք չեմ տխրել, դուք ինձ լավ գիտեք, որ ես տխրողներից չեմ: Ես շատ բաներ եմ տեսել, անցել 90-ական թվականներից: Կաշխատենք հանձնաժողովներում՝ մեր 37 պատգամավորներով»,- ասաց Բալասանյանը: Հարցին՝ հնարավո՞ր է, որ պատմությունը կրկնվի և, ինչպես տարիներ առաջ, ՕԵԿ-ից դուրս եկավ, այժմ էլ ԲՀԿ-ից դուրս գա, Ս. Բալասանյանը վստահեցրեց, որ դա չի կրկնվի, և ինքը դուրս չի գա ԲՀԿ-ից:
Նրա խոսքերով՝ ԲՀԿ գերակա ուղղությունը գյուղատնտեսությունն է, ՓՄՁ բիզնեսը, 4-րդ գումարման ԱԺ-ից կան օրենքի կիսատ նախագծեր, որոնք կփորձեն դնել շրջանառության մեջ ու կանոնակարգել ոլորտները. «Կլինենք կառուցողական ընդդիմություն՝ լավին լավ կասենք, վատին՝ վատ: Եթե լավ բան է արվում, ասում ենք շատ լավ է, եթե վատ բան է արվում, կասենք վատ է»:
Հարցին՝ հնարավո՞ր է ԲՀԿ-ն 6 ամիս անց կրկին վերադառնա կոալիցիա, Ս.Բալասանյանը պատասխանեց. «Կապրենք՝ կտեսնենք»: Միաժամանակ, նա վստահեցրեց, որ ԲՀԿ–ի՝ ընդդիմություն դառնալուց հետո բիզնեսի հետ կապված ոչ մի խնդիր չի առաջացել։
