Լոնդոնի քաղաքապետ Բորիս Ջոնսոնը BBC London հեռուստաալիքի եթերում հայհոյել է BBC-ի քաղաքական լրագրող Թիմ Դոնովանին: Այս մասին հայտնում է BBC News-ը:
Ապրիլի 29-ին Թիմ Դոնովանի Sunday Politics հաղորդման ժամանակ ցուցադրվել է մի սյուժե, որտեղ պատմվել է, թե ինչպես 2010թ., երբ Ռուպերթ Մերդոկի News International հրատարակչությունը կրկին մեղադրվել է հեռախոսային զրույցները գաղտնի լսելու մեջ, Ջոնսոնը փորձել է Մերդոկի հետ կնքել հովանավորության մասին պայմանագիր:
Ջոնսոնը, ով այդ ժամանակ արդեն Լոնդոնի քաղաքապետն էր, փորձում էր համաձայնության գալ Մերդոկի հետ Լոնդոնում ճոպանուղու ու ակադեմիայի շենքերի նախագծերի շուրջ:
Հաղորդման հաջորդ օրը BBC London-ի նորությունների բլոկի թղթակիցները Ջոնսոնին հարց էին ուղղել News International-ի հետ ունեցած հնարավոր կապերի մասին: Ի պատասխան` նա հայտարարել է, որ «գրողի տարած Դոնովանը հիմարություն է դուրս տվել» ու BBC London-ի լրոգրողներին առաջարկել է նորություններում պատմել այն մասին, թե ինչպես է ինքը կարողացել քաղաքի կարիքների համար 4 տարում հավաքել 100 մլն ֆունտ-սթեռլինգ:
