Իրանական Press TV-ի փոխանցմամբ՝ Իրանի ԱԳՆ-ի պաշտոնական ներկայացուցիչ Ռամին Մեհմանպարաստն այսօր տեղի ունեցած մամուլի ասուլիսի ժամանակ հայտարարել է, որ Մեծ Բրիտանիան պետք է նախ լուծի մարդու իրավունքների հետ կապված իր խնդիրները, ապա նոր սկսի խոսել Իրանում այդ խնդիրների մասին.
«Մեծ Բրիտանիան չպետք է միջամտի այլ երկրների գործերին, քանի որ նա ինքը ստիպված է գործ ունենալ մարդու իրավունքների խախտման հետ: Լոնդոնում ցուցարարների նկատմամբ գործադրված բռնությունները վկայում են, որ մարդու իրավունքների վիճակը վատթար է այնտեղ, և մենք նրանց խորհուրդ ենք տալիս զբաղվել դրանցով»:
Մեհմանպարաստն անդրադարձել է նաև մայիսի 13-14-ը ԱԷՄԳ-ի հետ Իրանի առաջիկա բանակցություններին՝ նշելով, թե Թեհրանն ակնկալում է, որ բոլոր անորոշությունները կլուծվեն բանակցությունների հետագա փուլերում:
Իսկ տարածաշրջանում ամերիկյան F-22 Raptor կործանիչների տեղակայման վերաբերյալ Մեհմանպարաստը նշել է, որ օտար ուժերը փորձում են ապակայունացնել իրավիճակը տարածաշրջանում՝ ընդգծելով, որ տարածաշրջանի բոլոր երկրները պետք է իրենց խնդիրները լուծեն առանց արտաքին ուժերի միջամտության, և իրենք պետք է, միմյանց օգնելով, ապահովեն Պարսից ծոցի տարածաշրջանի անվտանգությունը: