News Georgia-ի փոխանցմամբ՝ վրացի միլիարդատեր, ընդդիմադիր «Վրացական երազանք» քաղաքական կոալիցիայի առաջնորդ Բիձինա Իվանիշվիլին պլանավորել է իր ներկայացուցչին ուղարկել Շվեյցարիա՝ 2010 թվականին այդ երկրում քաղաքական ապաստան ստացած վրացի լրագրող Վախթանգ Կոմախիձեի մոտ, որը հայտարարել է, թե գործարարին վտանգ է սպառնում:
Կոմախիձեն Facebook-ի իր էջում տեղեկատվություն է հրապարակել, թե Իվանիշվիլիի կյանքին վտանգ է սպառնում Վրաստանի իշխանությունների կողմից: Այս կապակցությամբ Իվանիշվիլին հայտարարել է, որ նրա մոտ է գործուղելու իր ներկայացուցչին՝ ընդգծելով, որ բոլորին է հայտնի, թե իշխանություններն ինչի են ընդունակ.
«Այսօր իշխանությունները գտնվում են էյֆորիայի մեջ՝ կարծելով, թե կարող են բռնությունների ու ահաբեկումների միջոցով հաղթել ընտրություններում: Սակայն հետագայում, երբ գիտակցեն, որ դա անհնար է, նմանատիպ վտանգը կմեծանա:
Երբ սկսում էի իմ քաղաքական գործունեությունը, գիտակցում էի, թե ինչ դժվարություններ կարող են ծառանալ իմ առջև: Սակայն դրանք չեն կարող փոխել ընտրական գործընթացն ու իմ գործողությունները: Ես կշարունակեմ իմ գործունեությունը»:
Իվանիշվիլին հավելել է, որ դեռ չի քննարկել նորաստեղծ «Ընտրողների լիգայի» հասարակական շարժման հետ համագործակցելու հարցը:
