Ռուսաստանը ԱՄՆ-ի գործընկերն է շատ հարցերում, իսկ ԱՄՆ նախագահի պաշտոնին հավակնող Միթ Ռոմնիի դիրքորոշումը Ռուսաստանի վերաբերյալ հնացած է. CNN-ին տված հարցազրույցում նման հայտարարություն է արել ԱՄՆ պետքարտուղարը:
Հիշեցնենք, որ Ռոմնին Ռուսաստանն անվանել էր իր երկրի թիվ մեկ «աշխարհաքաղաքական թշնամին»:
«Եթե սթափ նայենք մեզ շրջապատող աշխարհին, կտեսնենք բազմաթիվ խնդիրներ, որոնք անցյալի վերապրուկներ չեն, այլ ակտուալ են: Եվ դրանցից շատերի լուծման հարցում Ռուսաստանը մեր դաշնակիցն է: Մասնավորապես, Ռուսաստանն անգնահատելի օգնություն է ցուցաբերում ԱՄՆ-ին Աֆղանստանի և Իրանի խնդրում»,- ասել է պետքարտուղարը` հավելելով, որ «պետք չէ շրջվել և անցյալում հակամարտություններ փնտրել. դա կառուցողական մոտեցում չէ»:
«Ավելի լավ է նայել ներկայիս իրավիճակին և օգնել երկու երկրներին բարելավել հարաբերությունները»,- ասել է Քլինթոնը:
Հիշեցնենք, որ այսօր նմանատիպ հայտարարությամբ հանդես է եկել նաև ԱՄՆ փոխնախագահ Ջո Բայդենը:
