Երեկ «Առաջին լրատվականը» հայտնել էր, որ կարճատև այցով գտնվելով Կիպրոսում` Գերմանիայի կանցլեր Անգելա Մերկելը հայտարարել էր, թե Թուրքիայի հետ վեճում աջակցում է Կիպրոսի դիրքորոշմանը և կոչ էր արել Թուրքիային անհապաղ բացել նավահանգիստներն ու օդանավակայանները կիպրական ընկերությունների համար: Նա նաև մեղադրել էր Թուրքիային խաղաղության գործընթացը տապալելու մեջ:
Եվ ահա, Թուրքիայի իշխանությունները երեկ բավականին կտրուկ պատասխանել են Մերկելին։ Պատասխանն իր էջերում ամփոփել է թուրքական Zaman-ը:
Ինչպես նշում է թերթը, Թուրքիայի արտգործնախարար Ահմեդ Դավութօղլուն ասել է, թե Գերմանիայի կանցլերը երևի պատմություն վատ գիտի, և խորհուրդ է տվել նրան թեյ խմել նախկին արտգործնախարար Գերհարդ Շրյոդերի հետ՝ սրանով ակնարկելով, որ 2004 թ. Կիպրոսի թուրքական մասը կողմ էր ՄԱԿ-ի կարգավորման ծրագրին, իսկ հունականը մերժեց այն: Մինչդեռ գերմանացիները հիմա փորձում են ողջ մեղքը բարդել թուրքերի վրա: Իսկ Շրյոդերին հիշատակելը նշանակում էր, որ ներկայիս կանցլերին Շրյոդերը կարող է պատմել ողջ իրականությունը՝ ըստ թուրքական կողմի:
Բացի այդ, Դավութօղլուն հիշեցնում է, որ Մերկելը, 2007 թ. ելույթ ունենալով Բունդեսթագում, հայտարարել էր, որ սխալ էր Կիպրոսին ԵՄ ընդունելը` առանց կիպրական հարցի լուծման:
«Վերջին երկու տարիներին բոլոր դրական նախաձեռնությունները եղել են թուրքական կողմից: Եթե տիկին Մերկելը լսեր երկու կողմերի տեսակետներն էլ, հավանաբար, այդպիսի սխալ, միակողմանի հայտարարություն չէր անի»,- ասել է Դավութօղլուն:
