«Նարեկացի» արվեստի միության հիմնադիր նախագահ Նարեկ Հարթունյանը դեկտեմբերին պետք է մեկներ Ֆրանսիա`այցելելու հոր շիրմին: Ունենալով առողջական խնդիրներ` նա մտադիր էր Ֆրանսիայից մեկնել ԱՄՆ՝ ընտանեկան բժշկին այցելելու նպատակով: Այս պատճառաբանությամբ Ն. Հարթունյանը դեկտեմբերի 16-ին դիմել է իր գործը քննող քննիչին, սակայն մերժվել է`դեկտեմբերի 26-ին նախատեսված առերեսման պատճառաբանությամբ: Այս մասին «Առաջին լրատվական»-ին տեղեկացրեց Նարեկ Հարթունյանի փաստաբան Լեռնիկ Հովհաննիսյանը`քննիչի ներկայացրած պատճառաբանությունը համարելով արհեստական: Նրա խորին համոզմամբ` քննիչը և գործի քննությունը վերահսկող դատախազն ամեն ինչ անում են քննությունը խոչընդոտելու և սխալ ուղով տանելու համար:
Քննության գաղտնիությունից ելնելով`փաստաբանը նախընտրեց շատ մանրամասներ չհայտնել, չնայած այն քննությունը, որը հիմա է շարունակվում, քննություն չի համարում: Նրա խոսքով` քննիչը և դատախազը, ով անմիջապես հսկում է գործի քննությունը, ի վիճակի չեն և՛ իրավական, և՛ բարոյական տեսանկյունից այս քննությունը շարունակել, քանի որ ակնհայտ պատվեր է իրականացվում Հարթունյան ընտանիքի դեմ:
Հարցին, թե փաստաբանական խումբը ի՞նչ միջոցներ է ձեռք առել քննությունը ճիշտ ուղով տանելու համար, պատասխանեց, որ իրենք իշխանական ռեսուրսներ չունեն, դրանք միայն իրավական են: «Դեկտեմբերի 26-ին բացարկ ենք հայտնել քննիչի դեմ Քրեական դատավարության օրենսգրքի համաձայն, սակայն դեռ պատասխան չկա»,- մանրամասնեց Լ. Հովհաննիսյանը: Փաստաբանի համոզմամբ` նման պայմաններում օբյեկտիվ քննության մասին խոսք լինել չի կարող:
Հիշեցնենք, ՊԵԿ քննչական վարչության վարույթում քննվող քրեական գործով «ՋԻ Էյջ Ստորիջ Էնթրփրայզիս» ՍՊԸ տնօրեն Նարեկ Հարթունյանին, հաշվապահ Արթուր Գալստյանին 2011թ. դեկտեմբերի 9-ին մեղադրանք էր առաջադրվել ՀՀ քրեական օրենսգրքի 205 հոդվածի 2-րդ, 38-205 հոդվածի 2-րդ (առանձնապես խոշոր չափերով հարկերը, տուրքերը կամ պարտադիր այլ վճարումները վճարելուց չարամտորեն խուսափելը) և 190 հոդվածի 2-րդ մասի 1-ին կետով (հանցավոր ճանապարհով ստացված եկամուտներն օրինականացնելը, որը կատարվել է խոշոր չափերով (փողերի լվացում)), իսկ ընկերության փոխտնօրեն Անի Մնացականյանին` 38-205 հոդվածի 2-րդ մասով (առանձնապես խոշոր չափերով հարկերը, տուրքերը կամ պարտադիր այլ վճարումները վճարելուց չարամտորեն խուսափելուն օժանդակելը), և նրանց նկատմամբ Երևանի Կենտրոն և Նորք-Մարաշ վարչական շրջանների առաջին ատյանի դատարանի որոշմամբ որպես խափանման միջոց էր կիրառվել կալանավորումը: Կալանավորումը կիրառվել էր Նարեկ Հարթունյանի հոր մահվան 40-րդ օրը: Մի քանի օր անց Նարեկ Հարթունյանն ու իր աշխատակիցներն ազատ էին արձակվել:
