Ես չէ, որ պետք է ասեմ, որ մարդու իրավունքների պաշտպանությունը մեզանում խայտառակ վիճակում է: «Մարդու իրավունք» ասվածը մեզ համար թղթի վրա գրված մի բան է: «Առաջին լրատվական»-ի հետ զրույցում, անդրադառնալով «Նարեկացի» արվեստի միության նախագահ Նարեկ Հարթունյանի նկատմամբ երկամսյա կալանք սահմանելու փաստին, ասաց դերասան Աշոտ Ադամյանը:
Նրա խոսքով, քանի դեռ մեզանում, վտանգված են մարդու իրավունքները, ինքն ամեն ինչ կարող է` մտածել` «սա սարքած է, սարքած չէ»:
«Ավելի հակված եմ մտածել, որ սա սարքած է, որովհետև աչքս չի տեսել, ականջս չի լսել, որ մեղավորները պատժվում են: Պատժվում են մարդիկ, որոնք պարզապես հաճելի չեն այս իշխանավորներին»,- համոզմունք հայտնեց դերասանը` հավելելով, թե այս իշխանությունների համար մարդու իրավունք ասվածը նույնն է, ոնց որ թշնամին, հետևաբար, նման պայմաններում խոսել մարդու իրավունքների մասին` կա՞ այն, թե՞ ոչ, համարում եմ ավելորդ»:
Ինչ վերաբերում է հանուն մարդու իրավունքների պայքարելուն, ապա Ա. Ադամյանը համոզված է, որ բոլոր մարդիկ, ովքեր գոնե արտասանում են այդ բառը, պարտավոր են պայքարել մարդու իրավունքների պաշտպանության համար: Իսկ սեփական իրավունքների պաշտպանության համար, ըստ նրա, չի պայքարում միայն թերմարդը:
«Անիրավունք մարդն ո՞ւմ է պետք: Ցանկացած պահի, ցանկացած ժամանակ մարդ պետք է պայքարի իր սեփական իրավունքների համար, որոնց մեջ, անշուշտ, մտնում է «մարդու իրավունք» ասվածը: Եթե չես պայքարում, ուրեմն քեզ ավելի վատ բաներ են սպասվում: Ուրեմն արժի, որ քո վրա ման գան, արժի, որ քո երեսին թքեն, քեզ բանի տեղ չդնեն»,- նշեց նա:
