Վրացական GHN լրատվական գործակալության փոխանցմամբ՝ Վրաստանի նախագահ Միխեիլ Սաակաշվիլին դպրոցականների հետ հանդիպման ժամանակ անդրադարձ է կատարել սոցցանցերի խնդրին.
«Շատ կարևոր է, որ վրացիները ակտիվ լինեն սոցիալական մեդիա դաշտում։ Այսօր ԶԼՄ-ներում ընթանում է գաղափարական պայքար։ Одноклассники-ն ստեղծվել էր նրա համար, որպեսզի տեսնեին, թե ինչ կարծրատիպեր են առկա հետխորհրդային տիրույթում, ինչը կարող է ազդել հետխորհրդային մարդու վրա, ինչպես նաև հետխորհրդային բոլոր հանրապետություններում տեղի ունեցածի մասին առավելագույն տեղեկատվություն ստանալու համար։
Այդ ժամանակ Одноклассники-ն շատ նորաձև էր Վրաստանում, սակայն այժմ հաղթել է Facebook-ը, քանի որ մենք մեր մտածելակերպով այլևս չենք համարվում հետխորհրդային երկիր»։
Հիշեցնենք, որ այս տարվա սեպտեմբերի վերջին SocialBakers.com կայքը հայտնեց, որ Վրաստանում Facebook սոցիալական ցանցից օգտվողների թիվը հասել է 655,700-ի, ինչը կազմում է երկրի բնակչության գրեթե 18 տոկոսը։ Այդ ցուցանիշով Վրաստանն աշխարհում զբաղեցրել է 86-րդ տեղը։
