System Of A Down-ի հայաստանյան ամենամեծ ֆան ակումբը հանդես է գալիս յուրօրինակ նախաձեռնությամբ` կազմակերպելով մրցույթ հատուկ նրանց hամար, ովքեր ցանկանում են ունենալ @soad.am վերջավորությամբ էլեկտրոնային հասցե: Այս մասին «Առաջին լրատվական»-ի հետ զրույցում տեղեկացրեց Soad.am ֆան ակումբի նախագահ Վահե Շահվերդյանը` հավելելով, որ զրոյից իր ձեռքով հավաքել է կայքը` որպես նվեր System Of A Down-ի երկրպագուներին:
«Soad.am կայքի պաշտոնական գնումից հետո (գործում է շուրջ մեկուկես ամիս) @soad.am էլեկտրոնային հասցեներ ունենալու շատ ցանկացողներ կային, և երկար մտածելուց հետո, ֆան ակումբում եռանդ ու ակտիվություն մտցնելու նպատակով, հայտարարվեց մրցույթ, որտեղ կհաղթեն երկուսը` ստանալով բաղձալի հասցեները»,- հայտնեց Վ. Շահվերդյանը:
Մրցույթում հաղթող կճանաչվեն նրանք, ովքեր կներկայացնեն լավագույն նկարը, երգը, բանաստեղծությունը, տեսանյութը Soad.am-ի մասին, ընդ որում՝ մեկ անձը կարող է ներկայացնել մեծ քանակությամբ նկարներ, երգեր, տեսանյութեր: Մրցույթի մասնակիցները կընտրվեն ու կպարգևատրվեն հոկտեմբերի վերջին:
Վահե Շահվերդյանը ուրախությամբ տեղեկացրեց նաև, որ, նախնական պայմանավորվածության համաձայն, System Of A Down-ի անդամները, 2012 թ. գալով Հայաստան, կհանդիպեն ֆան ակումբի անդամների հետ:
