ՄԻՊ Քրիստիննե Գրիգորյանի հրաժարականից միայն երկու ամիս անց իշխանությունը ներկայացրեց ՄԻՊ իր թեկնածուին՝ Անահիտ Մանասյանին, որը, իրավաբանական հանրույթի գնահատմամբ, երբևէ ՄԻՊ ամենաանհաջող թեկնածուն է: Մասնագետների գնահատմամբ՝ նա Սահմանադրության պահանջներին չի համապատասխանում, քանի որ իրավապաշտպան գործունեության որևէ փորձ չունի, հեղինակավոր իրավաբանի չափորոշիչին չի համապատասխանում, եղել է հանրային ծառայող, Գագիկ Հարությունյանի գլխավոր խորհրդականը ՍԴ-ում, Արդարադատության ակադեմիայի պրոռեկտոր, գլխավոր դատախազի տեղակալ:
Նա որևէ քաղաքացու իրավախորհրդատվություն մատուցած չկա, անգամ փաստաբան չէ, որը ևս այս առումով կարևոր է, որովհետև փաստաբանությունն էլ իրավապաշտպան գործունեության տեսակ է:
Բացի այդ, օրերս ԱԺ-ում Անահիտ Մանասյանը լրագրողներից փախուստի դիմեց: Նա իրեն պահում է անպատրաստ ուսանողի նման, որը կանխազգալով, որ իրեն կարող են տալ հարցեր, որոնց ինքը պատրաստ չի պատասխանելու, ինքը քննությանը կամ ստուգարքին ուղղակի չի ներկայանում:
Ավելին, նշվում է, որ վերջինս Դավիթ Հարությունյանի, Գագիկ Ղազինյանի, Գագիկ Հարությունյանի, Կարեն Կարապետյանի կադրն է, ունի հստակ կապեր, օրինակ, իր մտերիմներից է «Պատիվ ունեմ» դաշինքի պատգամավոր Աննա Մկրտչյանը, որը ասպիրանտ է ԵՊՀ-ի իրավաբանական ֆակուլտետում: Նա մտերիմ է «Հայաստան» խմբակցության պատգամավոր Ասպրամ Կրպեյանի հետ: Տեսակետ կա, որ նա բազմաթիվ թելերով կապված է տարբեր մարդկանց հետ, այդ թվում՝ նախկին իշխանության ներկայացուցիչների, դրա համար էլ այս օրերին իրեն չեն քննադատում: Բացի վերը նշվածից, Անահիտ Մանասյանը գլխավոր դատախազ Աննա Վարդապետյանի մտերիմ ընկերուհին է: Փաստացի, նա ավելի շատ ընդդիմության թեկնածուն է, քան իշխանության, դրա համար էլ ընդդիմադիրների շուրթերից որևէ քննադատություն նրա թեկնածության վերաբերյալ չենք լսում: Նա իր ողջ կարիերայի համար պարտական է Գագիկ Հարությունյանին, որի գլխավոր խորհրդականն է եղել 7-8 տարի:
Տպավորություն է, որ իշխանությունը ՄԻՊ ինստիտուտի նկատմամբ ունի անլուրջ մոտեցում, և թե թեկնածուների հարցում, թե պաշտպանների կարճաժամկետ պաշտոնավարման հարցում դա ակնհայտ է երևում է:
