Վանաձոր համայնքի ավագանու «Հայրենիք» խմբակցության ղեկավար Վահե Դոխոյանը Վանաձոր համայնքի խմբակցություններին և ավագանու յուրաքանչյուր անդամի առաջարկել է ընդունել որոշում օրենքով սահմանված հնարավորինս սեղմ ժամկետներում Վանաձոր համայնքի ավագանու նոր ընտրություններ անցկացնելու մասին, իսկ դրանից հետո երկրորդ քայլով համատեղ քվեարկել Վանաձոր համայնքի բյուջեն հաստատելու օգտին։
Արդեն որերորդ անգամ «Ասլանյան» դաշինքի ու «Հայրենիք» կուսակցության անդամները բոյկոտում են ավագանու նիստերը:
Այս առնչությամբ Հելսինկյան քաղաքացիական ասամբլեայի Վանաձորի գրասենյակի ժողովրդական ինստիտուտների մոնիթորինգի և զեկուցման համակարգող Վարդինե Գրիգորյանը «Առաջին լրատվական»-ի հետ զրույցում նշեց, որ եթե Վանաձորի ավագանու անդամներից կեսից ավելին մանդատը վայր դնի, ավագանին կլուծարվի շատ արագ և շատ հեշտ:
«Դա այնքան պարզ լուծում է ու հնարավոր չէր, որ ավագանու անդամները մտածած չլինեին դրա մասին: Դա կլիներ լավագույն լուծումը, որովհետև դատարանը չէր կարող ավագանուն ստիպել՝ չլուծարվել: Այսինքն՝ մի կողմից դատարանը չէր կարող որևէ ձևով միջամտել, մյուս կողմից «Լուսավոր Հայաստանի» իրավունքը չէր խախտվի դրանով: Եթե նիստերի արգելքը փաստացի իրավունքը պահելու իմաստով է, այս դեպքում միևնույն է, ավագանին լուծարվում է և այդ հարցը դուրս է գալիս:
Սա ամենաոչ ցավոտ լուծումը կլիներ, և ինձ մոտ տպավորություն է, որ սա շատ վաղուց կարող էին անել»,-հավելեց Գրիգորյանը:
Հարցին, թե այդ դեպքում ինչու չեն գնացել այդ քայլին ավելի վաղ, Վարդինե Գրիգորյանը պատասխանեց. «Ես կասեի, որ ամեն մեկն իր իր թիմի ընտրվելու շանսերն էր գնահատում՝ փորձելով դրան նախապատրաստվել:
«Չնայած չեմ էլ նկատել, որ առանձնապես քարոզչություն էին անում: Կամ ուղղակի հոգնել էին ընտրություներից հետո և արձակուրդ էին գնացել»-հավելեց նա:
Գրիգորյանը նշեց, որ ինքը վստահ չէ, որ եթե ավագանին նիստ անի և նիստով բյուջե հաստատի, արտահերթ նիստ հրավիրի հենց բյուջեի հաստատման համար, ապա ինչ-որ մեկը էլի պետք է վիճարկի՝ այդ որոշումն իրավաչափ էր, թե ոչ.
«Ես կասկածում եմ, թե ով կվիճարկի դա: Ո՞վ կմտածի, որ ուղղակի ինչ-որ սկզբունքների հետևից ընկնելն այս պահին ավելի կարևոր է, քան համայնքի բյուջեն: Կոպիտ ասած որոշում կա և այդ որոշումները երբեմն խախտվում են: Իրենք կարող են փաստացի արտահերթ նիստ հրավիրել, ընդունել բյուջեն և մանդատները վայր դնել դրանից հետո»:
Մամիկոն Ասլանյանը կրկին կարող է գլխավորել ընտրական ցուցակը և մասնակցել ընտրություններին, քանի որ ինքը կալանքի տակ է, ոչ թե դատապարտված: Գրիգորյանի դիտարկմամբ՝ նա կարող է ունենալ ներկայացուցիչներ, որոնք քարոզչությամբ կզբաղվեն:
«Բայց ինձ թվում է, որ իրենք էլ կմտածեն, թե արդյոք արժե, որ Մամիկոն Ասլանյանը լինի համայնքապետի թեկնածուն, որովհետև փաստացի Մամիկոն Ասլանյանը կրկին չկարողացավ ապահովել մեծամասնություն ավագանիում: Նա կարող էր իշխանություն ձևավորել միայն կոալիցիայով: Գուցե իրեն ներկայացնող ուժը կամ ավագանու մյուս թեկնածուները վերանայեն իրենց դիրքորոշումը»,-հավելեց նա:
