Հայկական կողմի նախաձեռնությամբ ՌԴ նախագահ Վլադիմիր Պուտինը հեռախոսազրույց է ունեցել Հայաստանի Հանրապետության վարչապետ Նիկոլ Փաշինյանի հետ։ Շարունակվել է Ռուսաստանի, Հայաստանի և Ադրբեջանի ղեկավարների միջև 2020 թվականի նոյեմբերի 9-ի, հունվարի 11-ի և 2021 թվականի նոյեմբերի 26-ի եռակողմ պայմանավորվածությունների իրականացման գործնական ասպեկտների քննարկումը։ Մասնավորապես, մտքերի փոխանակություն է տեղի ունեցել հայ-ադրբեջանական սահմանին անվտանգության ապահովման և Հարավային Կովկասում տնտեսական, տրանսպորտային և նյութատեխնիկական կապերի վերականգնման հարցերի շուրջ։ Նիկոլ Փաշինյանը տեղեկացրել է Հայաստանի և Թուրքիայի միջև հարաբերությունների կարգավորմանն ուղղված վերջին շփումների մասին։ Թեմայի շուրջ «Առաջին լրատվական»-ը զրուցել է քաղաքագետ Էդգար Վարդանյանի հետ:
Վարդանյանը կարծում է, որ այս հեռախոսազրույցով Ռուսաստանը անընդհատ հիշեցնում է, որ ինքն է այստեղ թելադրողը:
Քաղաքագետը հիշեցնում է, որ չպետք է մոռանալ, որ նոյեմբերի 9-ի տեքստը Մոսկվան է գրել:
Քաղաքագետի համար անհասկանալի է, որ ռուսական կողմը մի քանի անգամ հայտարարել է, որ Ադրբեջանն է խախտել հրադադարը, բայց ինչ են անում որպես դաշնակից և խաղաղապահ առաքելություն իրականացնող. «Ռուս խաղաղապահ կոնտինգենտի մանդատի անհստակության հարց կա: Որոնք են ռուսական խաղաղապահ կոնտինգենտի գործառույթները: Խաղաղապահ կոնտինգենտը ուղղակի մոնիտորինգ է անում և ոչ ավելին»:
