Մի շարք երկրներ, այդ թվում՝ ԱՄՆ-ը, Կանադան, Մեծ Բրիտանիան, Ֆրանսիան, Իսպանիան, Իտալիան, Շվեդիան, Շվեյցարիան, Բելգիան, Նիդերլանդները, Իսրայելը, Քուվեյթը, կոչ են արել Ուկրաինայում իրենց քաղաքացիներին լքել երկիրը: Այդ մասին հայտնում են տվյալ երկրների արտաքին քաղաքական գերատեսչություններից:
Ավելի վաղ ԱՄՆ պետքարտուղարությունը հայտնել էր, որ ամերիկացի դիվանագետներին, որոնք առանցքային պաշտոններ չեն զբաղեցնում, հրահանգել է հեռանալ Ուկրաինայից:
Կիևը լքելու է նաև Նիդերլանդների դեսպանության աշխատակիցների մեծ մասը. տեղում մնալու են միայն այն դիվանագետները, առանց որոնց հնարավոր չէ ապահովել դիվանագիտական ներկայացուցչության բնականոն գործունեությունը:
Իսպանիայի իշխանությունները հայտարարել են, որ պատրաստ են անհրաժեշտության դեպքում տարհանել Կիևում իրենց դեսպանության անձնակազմին, սակայն դեռևս նման քայլ չեն ձեռնարկում:
Իրաքի իշխանությունները Կիևում իրենց դեսպանատան աշխատակիցներին կոչ են արել օգտվել ամենամյա արձակուրդից:
Վրաստանի արտգործնախարարությունից հայտնել են, որ դեսպանատունը Կիևում, Օդեսայի և Դոնեցկի հյուպատոսություններն անցնում են աշխատանքի արտակարգ ռեժիմի։
