«Առաջին լրատվական»-ի զրուցակիցն է ԳԽ պատգամավոր Ազատ Արշակյանը։
-Պարոն Արշակյան, Ռոբերտ Քոչարյանի ղեկավարած դաշինքը հայտարարել է նոյեմբերի 9-ին ու 10-ին հանրահավաք անցկացնելու մասին։ Մամուլում նաև ինֆորմացիա է հայտնվել, սակայն հերքվել, որ այդ օրերին նոր փաստաթղթի ստորագրում է նախատեսվում եռակողմ ձևաչափով։ Ի՞նչ դիտարկումներ ունեք ընդդիմության մարտավարության մասին։
-Ընդդիմությունը ցույց է անում ռուս-թուրքական 1921 թվականի Մոսկվայի կոնֆերանսի շահառուների՞, թե՞ զոհի դեմ։ Ես կարծում եմ, որ նրանք իրենց հրապարակային հայտարարություններում՝ Ազգային ժողովում ու իրենց ակտիվիստների հայտարարություններով վկայում են, որ ոչ թե դահիճներին են դատապարտում, այլ զոհին։ Սա նոր պատմություն չէ։ Դեռևս այն ժամանակներից քարոզչության թիրախը հայ ժողովուրդն է։ Սովետական ժամանակներում թիրախը հենց Դաշնակցությունն էր՝ որպես ռուս-թուրքական դաշինքի զոհ։ Հիմա արդեն, քանի որ Դաշնակցությունը չի սիրում լինել թիրախ, միացել է դահիճներին։ Նա էլ է քննադատում զոհին։ Հիմա Հայաստանի իշխանությունը իբրև թե մեղավոր է, որ իր ուժերը բավարար չեն Թուրանի դեմ պայքարելու համար։ Ես համարում եմ, որ սա մարադիորների մարշ է հայկական պետության ու Հայաստանում գործող իշխանության դեմ։ Ընկած, խոցված Հայաստանին ու նրա իշխանությանը խփում են փաստորեն։
-Կարծում եք՝ նրանք կունենա՞ն հասարակության աջակցությունը։
-Մարադիորի հնարավորությունն այն է, որ կրկնակոշիկները կտանի, գլխարկը։ Հնարավոր է , որ նաև ներքնաշորից ինչ-որ բան թռցնի, չլվացված, երկար ժամանակ օգտագործված ներքնաշորերն էլ կտանի զոհից։ Իրականում ես կարծում եմ, որ այսօր Հայաստանի Հանրապետությունը ունի լուրջ թշնամիներ, հակառակորդներ, բայց ունի նար դաշնակիցներ։
-Նրանք կօգնե՞ն Հայաստանին, ՀՀ իշխանություններին։
Դաշնակիցները, այդ թվում՝ զարմանալիորեն Ռուսաստանը գործընկեր է ճանաչում Հայաստանի այսօրվա իշխանությանը։
-Մինչդեռ իրենց պայքարը՝ Ռուսաստանի աչքին ավելի լավը երևալու համար է։
-Այո՛, բայց այսօր Հայաստանում գործող իշխանությանը Ռուսաստանի իշխանությունը համարում է գործընկեր։ Նա չի ճանաչում որպես գործընկեր ռոբերտականներին ու Ռոբերտ Քոչարյանին անձամբ։ Այդ իմաստով պետք չէ անփութություն դրսևորել, բայց առանձնապես մեծ հաջողություն ընդդիմությունը չի ունենա։ Բայց սա այն դեպքում, եթե իշխանությունը՝ Նիկոլ Փաշինյանի գլխավորությամբ հատուկ թափթփվածություն չցուցաբերի։
Լուսանկարը՝ panorama.am-ի
