Հանրության շրջանում անհայտ «Առաքելություն» կուսակցությունը, որը 2018-ի դեկտեմբերին ՔՊ-ի հետ դաշինք կազմեց և մասնակցեց խորհրդարանական ընտրություններին, այսօր այլևս գոյություն չունի։ Պարզվում է՝ «Առաքելություն» կուսակցության հիման վրա է ստեղծվել «Ապրելու երկիր» կուսակցությունը։ Այս մասին «Առաջին լրատվական»-ի հետ զրույցում ասաց «Ապրելու երկիր» կուսակցության քաղխորհրդի անդամ, 8-րդ գումարման ԱԺ «Իմ քայլը» խմբակցության պատգամավոր Վահե Հովհաննիսյանը։
Ինչպես գիտեք, օգոստոսի 15-ին տեղի ունեցավ «Ապրելու երկիր» կուսակցության անդրանիկ համաժողովը։ Այս կուսակցությունը հիմնադրել են Արցախի սոցիալական ապահովության նախկին նախարար Մանե Թանդիլյանը ու Հայաստանի աշխատանքի և սոցիալական հարցերի նախկին նախարար, «Առաքելություն» կուսակցության անդամ Մեսրոպ Առաքելյանը։ Կուսակցության հովանավորը, և ըստ էության, տերը, ռուսաստանաբնակ գործարար Ռուբեն Վարդանյանն է: Մամուլի տեղեկություններով, նա սերտ առնչություններ ունի Ռոբերտ Քոչարյանի հետ, ինչը ստվեր է գցում հիշյալ կուսակցության վրա:
Վահե Հովհաննիսյանը մեզ հետ զրույցում նշեց, որ «Առաքելության» շարքային անդանները չեն հեռացել շարքերից, հիմա համալրել են «Ապրելու երկիր» կուսակցության շարքերը. «Իհարկե, չեմ կարող ասել՝ շարքային կուսակցականները լքել են, թե ոչ, որովհետև որպես այդպիսին դիմում չեմ ստացել, բայց քաղխորհրդի անդամներից բոլորը մնացել են, բացի Հրաչ Սարգսյանից, որը հեռացել էր կուսակցությունից»,-նշեց նախկին պատգամավորը։
Հատկանշական է, որ «Առաքելության» որոշ անդամներ դեռևս մնում են Երևանի ավագանու «Իմ քայլը» խմբակցությունում։
Քաղաքապետի առաջին տեղակալ Հրաչ Սարգսյանն «Առաջին լրատվական»-ի հետ զրույցում նշեց, որ իրեն 2021թ հեռացրել են կուսակցությունից խորհրդարանական ընտրություններից առաջ։
Մանուկ Սուքիասյանն էլ նշեց, որ 2018-ի նոյեմբերից ինքը որևէ առնչրություն չունի հիշյալ կուսակցության հետ. «Ես իմ համախոհների հետ հիմնել եմ «Ինտելեկոտւալ Հայաստան» կուսակցությունը և ընդդիմադիր դաշտում ենք դիրքավորվել»,-ասաց նա՝ չբացառելով, որ առաջիկայում հնարավոր է մասնակցեն ՏԻՄ ընտրություններին։
