Լուսանկարը՝ Armeniasputnik-ի
Հայաստանի արտաքին գործերի նախարար Արարատ Միրզոյանը ԱՄՆ Նյու Յորք քաղաքում մասնակցելու է ՄԱԿ Գլխավոր Ասամբլեայի 76-րդ նստաշրջանին: Այդ առիթով գտնվելով ԱՄՆ-ում, Արարատ Միրզոյանը հանդիպում է ունենալու նաև ԵԱՀԿ Մինսկի խմբի համանախագահների հետ: Դա լինելու է Հայաստանի նոր արտգործնախարարի առաջին հանդիպումը համանախագահների հետ, սակայն հանդիպումն ըստ էության առաջինն է լինելու եռյակ ձևաչափով և թերևս ԱՄՆ համանախագահի համար:
Բանն այն է, որ անցնող շաբաթներին միմյանց հաջորդեցին ռուսաստանցի նոր համանախագահ Իգոր Խովաևի, և հետո ֆրանսիացի համանախագահ Ստեֆան Վիսկոնտիի այցերը: Ընդ որում, եթե ռուսաստանցի համանախագահը ճանաչողական այց կատարեց Բաքու, հետո օրեր անց Երևան, ու Երևանում հանդիպեց նաև Արցախի նախագահի հետ, ապա ֆրանսիացի համանախագահը կարծես թե այցելեց միայն Երևան և հանդիպեց Հայաստանի ղեկավարության հետ: Միաժամանակ ուշադրության է արժանի այն, որ Նյու Յորքում է գտնվելու նաև Ադրբեջանի արտգործնախարար Բայրամովը, որի այցի մասին ադրբեջանական հաղորդագրության մեջ սակայն չի նշվում Մինսկի խմբի համանախագահների հետ հանդիպման մասին: Սա իհարկե առաջացնում է հարց, թե արդյո՞ք համանախագահները ունեն միայն Միրզոյանի հետ հանդիպելու ցանկություն, թե՞ Ադրբեջանն է, որ չի ցանկացել հանդիպել համանախագահների հետ: Կա նաև այլ հարց՝ արդյո՞ք Արարատ Միրզոյանի հետ հանդիպման արդյունքից կամ բովանդակությունից է կախված Բայրամովի հետ հանդիպելու հեռանկարը: Հարցերը անշուշտ շատ են, այդ թվում կապված նաև համանախագահ երկրների միջև մոտեցումների համադրելիության աստիճանի հետ: Որքանով են նրանք հավասարապես շահագրգռված համանախագահության ձևաչափի ակտիվացումով, և որքանով է այդ գործընթացը նրանց համար տակտիկական նշանակության:
Հայաստանում ԱՄՆ դեսպան Լին Թրեյսին սեպտեմբերի 20-ին Հայաստանի Հանրային հեռուստաընկերությանը տված հարցազրույցում հայտարարեց, որ ՄԱԿ ԳԱ հարթակը ևս օգտագործվելու է Մինսկի խմբի ձևաչափի ներքո խաղաղ գործընթացի վերականգնման ուղղությամբ աշխատանքը առաջ մղելու համար: Առերևույթ, այդ աշխատանքին խոչընդոտում է Բաքուն, որը հայտարարում է, թե պատերազմի միջոցով լուծել է հակամարտությունը և չկա խաղաղ բանակցության կարիք, չկա կարգավիճակի հարց: Խորքային առումով սակայն իրավիճակը թերևս էլ ավելի բազմաշերտ է և բարդ, հաշվի առնելով և այն, որ նույն ԱՄՆ դեսպանը խոսում է խաղաղ գործընթացի համար կողմերի երկուստեք միմյանց հետ խոսելու կարողության և փոխզիջումների պատրաստ լինելու մասին, ինչից առնվազն բխում է հարց, թե ինչ փոխզիջում կարող է ակնկալվել հայկական կողմից, որը կարծես թե իր զիջելիքը պարտվեց պատերազմում:
