Տոկիոյում շարունակվող 32-րդ ամառային Օլիմպիական խաղերում վաղը ելույթ կունենան պայքարի մեջ մնացած Հայաստանի վերջին երկու ներկայացուցիչները։ Ազատ ոճային ըմբշամարտի 65 քաշային կարգում աշխարհի գավաթակիր Վազգեն Թևանյանը 1/8-րդ եզրափակչում կմրցի աշխարհի գործող չեմպիոն, Եվրոպայի կրկնակի չեմպիոն ռուսաստանցի Հաջիմուրադ Ռաշիդովի հետ։ Մենամարտը կսկսվի Երևանի ժամանակով առավոտյան 06։30-ին։ Բռնցքամարտի 66 քաշայինների կիսաեզրափակչում էլ Հովհաննես Բաչկովը ժամը 09։32-ին կմենամարտի ամերիկացի աշխարհի փոխչեմպիոն Դևից Քեյշոնի հետ։ Ինչ կարելի է սպասել մեր երկու մարզիկներից։ Անդրադառնանք թերևս Վազգեն Թևանյանին, որը հենց մեկնարկում անց է կացնելու մեզ համար սկզբունքային գոտեմարտ։ Թևանյանն անցյալ տարվա հայկական սպորտի գլխավոր հայտնությունն էր։ 2020 թվականի դեկտեմբերին Սերբիայի մայրաքաղաք Բելգրադում տեղի ունեցած աշխարհի առաջնությունում Թևանյանն ուղղակի ֆանտաստիկ ելույթով նվաճեց ոսկե մեդալ։
Որակավորման փուլում Թևանյանը 6։0 հաշվով պարտության էր մատնել Մոլդովայի ներկայացուցիչ Նիկոլայ Գրահմեզին, 1/8 եզրափակչում հաղթել էր բահրեյնցի Հաջի Մոհամեդ Ալիին 11։0։ Քառորդ եզրափակչում 10։0 հաշվով առավելության էր հասել ռումինացի Նիկոյալ Օխլոպկովի նկատմամբ, իսկ եզրափակչի ուղեգրի համար գոտեմարտում 7։2 հաշվով հաղթել էր Ուկրաինայի ներկայացուցիչ մեր հայրենակից Գոռ Հովհաննիսյանին։ Եզրափակչում հայ ըմբիշը 9։1 հաշվով ջախջախել էր Հունգարիայի ներկայացուցիչ Իսմայիլ Մուսուկաևին։ Թևանյանը աշխարհի գավաթի խաղարկության բոլոր գոտեմարտերում հաղթանակի էր հասել խոշոր՝ ջախջախիչ հաշիվներով, ինչը բացառիկ արդյունք է։ Օլիմպիական խաղերի ուղեգիր Թևանյանը նվաճել էր այս տարվա մարտին Բուդապեշտում տեղի ունեցած վարկանիշային մրցաշարում։ Այստեղ Թևանյանը պայքարը սկսել էր որակավորման փուլից, որտեղ ժամանակից շուտ 11։0 հաշվով պարտության էր մատնել բուլղարացի Վլադիմիր Դուբովին: Քառորդ եզրափակիչի ուղեգիրը նա վիճարկել էր Բելառուսի ներկայացուցիչ Նիուրգուն Սկրիաբինի հետ և հաղթել 7։5 հաշվով։ Քառորդ եզրափակչում Հայաստանի ներկայացուցիչը 6։4 հաշվով առավելության էր հասել Ռիո-2016 Օլիմպիական խաղերի չեմպիոն, վրացի Վլադիմիր Խանչեգաշվիլիի նկատմամբ, իսկ կիսաեզրափակչում ուժեղ էր գտնվել Լեհաստանը ներկայացնող 33-ամյա Մոգամեդմուրադ Գաջիևից: Եզրափակչում Հայաստանի ներկայացուցիչը 9:0 հաշվով ջախջախիչ հաղթանակի էր տարել Ռիո-2016 Օլիմպիական խաղերի բրոնզե մեդալակիր, աշխարհի և Եվրոպայի եռակի չեմպիոն ադրբեջանցի Հաջի Ալիևի նկատմամբ: Նշված արդյունքները խոսում են այն մասին, որ Թևանյանի համար անհաղթահարելի մրցակիցներ չկան և մեր ըմբիշը ուժեղագուններից է այս քաշային կարգում։
Այո, Թևանյանին մեկնարկային գոտեմարտում բաժին է հասել բավական բարդ մրցակիցը, բայց ընդունենք նաև, որ օլիմպիադայում մեծ հաղթնակակի հասնելու համար պետք է բոլոր մրցակիցներից ակնհայտորեն ուժեղ լինել։ Ինչ է իրենից ներկայացնում Գաջիմուրադ Ռաշիդովը։ Վերջինս աշխարհի գործող չեմպիոն լինելուց զատ այս տարվա Ռուսաստանի չեմպիոնն է։ Ռաշիդովը մասնակցել էր նաև Սերբիայում տեղի ունեցած աշխարհի գավաթի խաղարկությանը սակայն Թևանյանի հետ չէր հանդիպել։ Մասնավորապես, 1/8-րդ եզրափակչում Ռաշիդովը 0։4 հաշվով զիջել էր Հաջի Ալիւին և դուրս մնացել հետագա պայքարից։ Զիջել էր այն նույն Ալիևին, որին Թևանյանը Բուդապեշտում ջախջախել էր 9։0 հաշվով։ Մեկնարկային գոտեմարտում հաղթելու դեպքում Թևանյանը լուրջ հայտ կներկայացնի օլիմպիական մեդալի համար պայքարելու։ Թևանյան-Ռաշիդով դիմակայությանը հաղթողը քառորդ եզրափակչում մրցելու է Մոգոմեդմուրադ Գաջիև (Լեհաստան) – Գեորգիոս Պիլիդիս (Հունաստան) զույգի հաղթողի հետ: Չմոռանանք, որ Արթուր Ալեքսանյանը նախօերին եզրափակիչ՝ սկանդալային գոտեմարտում զիջել էր ռուսաստանցի Մուսա Եվլոևին, որից հետո հայտարարել էր․ «Պետք է Ռուսսաստանից հաղթելու համար»։ Ալեքսանյան-Եվլոև գոտեմարտից հետո ըմբշամարտում հայ-ռուսական դիմակայությունը միանգամայն այլ կարևորություն է ստացել։
Թևանյանը պետք է անի հնարավորինը Ալեքսանյանի նկատմամբ իրականացված մրցավարական անարդարությանը վրեժխնդիր լինելու համար։ Ուշագրավ է, որ Թևանյանի դեմ ևս Ռուսաստանի կողմից կրկին գոտեմարտելու է ոչ ռուս ըմբիշ։ Գաջիմուրադ Ռաշիդովը ազգությամբ դաղստանցի է։ Մուսա Եվլոևը, որը մրցավարների օգնությամբ հաղթել էր Ալեքսանյանին՝ ազգությամբ ինգուշ է։
