Երկօրյա այցով Կիպրոսի թուրքական հատված այցելած Թուրքիայի նախագահ Ռեջեփ Էրդողանն անդրադարձել է Ադրբեջանի կողմից, այսպես կոչված, Հյուսիսային Կիպրոսի Թուրքական Հանրապետության հնարավոր ճանաչման հարցին:
Արցախյան երկրորդ պատերազմից հետո ակնկալիքներ կա՞ն, որ Ադրբեջանը կճանաչի Հյուսիսային Կիպրոսը, և արդյոք առաջին անգամ Ադրբեջանի պատվիրակության այցը Հյուսիսային Կիպրոս մեծացրե՞լ է այդ սպասելիքները՝ լրագրողի հարցին ի պատասխան Էրդողանը հայտարարել է, որ այդ հարցում կասկածելու բան չկա:
«Այս ամենը իմ եղբայր Իլհամ Ալիևի հետ պարբերաբար քննարկում ենք»,- ասել է Թուրքիայի նախագահը՝ հավելելով, որ հուսով է՝ փոխադարձ այցերը շարունակական բնույթ կստանան եւ կշարունակվեն բարձր մակարդակով։
Տարածաշրջանային հարցերով փորձագետ Արմեն Պետրոսյանի կարծիքով՝ Էրդողանի վերջին այցը Հյուսիսային Կիպրոսի թուրքական հանրապետության ինքնահռչակ հատված իր բնույթով ու հնչեցված հայտարարությունների բովանդակությամբ էականորեն տարբերվում է նախորդներից․«Զգացվում է, որ նրա շատ ավելի ինքնավստահ պահվածքը և կիպրոսյան այդ հիմնախնդրում «երկու պետություն երկու ժողովուրդների համար» սկզբունքային շեշտադրումը։Սա նշանակում է, որ ըստ էության թուրքական կողմը, որը համարվում է կիպրոսյան հիմնախնդրի կողմերից մեկը, չի պատրաստվում զիջումների գնալ այդ հակամարտության համատեքստում, փաստացի շեշտադրում կատարելով միջազգային իրավունքի հիմնարար սկզբունքի՝ այն է, ազգերի ինքնորոշման իրավունքի վրա։ Սա բովանդակային փոփոխություն է, որը հարկ է ամրագրել»,-«Առաջին լրատվական»-ի հետ զրույցում ասաց նա։
Մեր զրուցակցի դիտարկմամբ՝ հարկ է ընդգծել, որ թուրքական կողմի այս շեշտադրումն առավել սկզբունքային դարձավ Լեռնային Ղարաբաղի հակամարտության շրջանակներում տեղ գտած վերջին փոփոխություններից հետո․«Այսինքն՝առ այն, որ 44 օրյա պատերազմից հետո և՛ Թուրքիան և Ադրբեջանը հայտարարում են, որ ղարաբաղյան հակամարտությունն այլևս կարգավորված է և նման հիմնախնդիր միջազգային հարաբերություններում չկա։ Սա նաև խոսում է այն մասին, որ Հայաստանի Հանրապետության համար ստեղծվում է լայն դաշտ՝ Թուրքիայի այդ երկակի ստանդարտների կիրառման քաղաքականությունը միջազգային տարաբնույթ կազմակերպություններում կամ գործընկերների հետ համագործակցության շրջանակներում վերհանելու ու Թուրքիայի դեմ օգտագործելու համար։
Մի կարևոր իրողություն էլ․ Էրդողանի վերջին այցը հյուսիսային Կիպրոսի թուրքական ինքնահռչակ հանրապետության տարածք և այնտեղ տեղ գտած միջոցառումները տարբերվում էին նախորդ այցելություններից։ Առաջին անգամ այդ միջոցառումներին մասնակցում էր Ադրբեջանի խորհրդարանական պատվիրակությունը։ Նաև Էրդողանն է իր հարցազրույցներից մեկում նշել, որ չի բացառվում, որ Ադրբեջանի կողմից հյուսիսային Կիպրոսի թուրքական հատվածի ճանաչում։ Սա ևս կարևոր հանգամանք է ու Հայաստանի համար լայն դաշտ է ստեղծում նաև Ադրբեջանի դեմ դիվանագիտական հարթակում աշխատելու համար»։
Հարցին՝ արդյոք նման հեռանկարի դեպքում Հայաստանի վրա կարող է Ղրիմի ճանաչման պարտադրանք լինել, Արմեն Պետրոսյանը պատասխանեց․«Ես կարծում եմ, որ նման գործընթացի համար կիպրոսյան հիմնախնդրում տեղ գտած խնդիրները հազիվ թե որևէ ազդեցություն ունենան։ Սա առավելապես Հայաստան-Ռուսաստան, Հայաստան-Ուկրաինա հարաբերությունների տիրույթում է։ Բնականաբար այդ եռանկյունուց բացի Հայաստան-արևմուտք հարաբերությունների տիրույթում է։ Հաշվի առնելով այն հանգամանքը, որ վերջին շրջանում արձանագրվում է նաև արևմտյան ուղղությամբ Հայաստանի Հանրապետության արտաքին քաղաքականության ակտիվացում, ընդ որում՝ փոխադարձ սկզբունքով, ապա ես չէի կանխատեսի նման սցենար»։
