Կեֆիրը կբարելավի մարսողությունը, կօգնի օրգանիզմին չափից շատ ուտելուց հետո և կուժեղացնի իմունային համակարգը: Սննդաբան Ելենա Սոլոմատինան Sputnik ռադիոյին տված հարցազրույցում խոսել է այս հայտնի կաթնաթթվային ըմպելիքի օգուտների մասին:
Առաջին հերթին, կեֆիրի օգնությամբ կարելի է կազմակերպել բեռնաթափման օրեր: Սա հատկապես ճիշտ է խնջույքից հետո:
«Սկզբունքորեն, կարելի է կազմակերպել բեռնաթափման օր, երբ գերհագեցվածության զգացողություն կա», – ասել է Սոլոմատինան:
Սննդաբանը խորհուրդ է տվել բեռնաթափման օրվա ընթացքում խմել մեկ լիտր կեֆիր կամ պատրաստել բանջարեղենով սառը ապուրներ այս ըմպելիքից: Բացի այդ, կեֆիրը լավ է համադրվում հատապտուղների հետ, ավելացրել է նա:
Այնուամենայնիվ, ավելի լավ է նման բեռնաթափման օրերը կազմակերպել ոչ ավելի, քան շաբաթը մեկ անգամ:
Առնվազն փոքր քանակությամբ կեֆիրի կանոնավոր օգտագործումը մեծ օգուտ կբերի օրգանիզմին: Այս կաթնաթթվային ըմպելիքի միջոցով դուք կարող եք ամրապնդել ձեր իմունիտետը, նշել է սննդաբանը:
«Բանն այն է, որ մեր իմունիտետի 70 տոկոսը կենտրոնացած է աղիների մեջ և կախված է միկրոբիոտայի վիճակից, որի վրա ուղղակիորեն ազդում է կեֆիրը: Կեֆիրը պրոբիոտիկ է, այն իր մեջ կրում է անհրաժեշտ մանրէներ, որոնք օգնում են մեր իմունիտետին և որոշում օրգանիզմի կարողությունը հաղթահարելու պաթոգեն ֆլորան, որը գալիս է ներսից և դրսից», – բացատրել է Սոլոմատինան:
Միկրոբիոտայի բարենպաստ վիճակը պահպանելու համար օրական մեկ բաժակ կեֆիրը բավական կլինի: Այն կարող եք ժամանակ առ ժամանակ փոխարինել այլ կաթնաթթվային մթերքներով, եզրափակել է սննդաբանը:
