Ադրբեջանական ANS PRESS-ը, վկայակոչելով Eurasianet.org-ի իր աղբյուրին, նշում է, որ 2010 թվականին Ուկրաինան շարունակել է ղարաբաղյան հակամարտության կողմերին սպառազինություն վաճառելու ավանդույթը։
Նախորդ տարի Ուկրաինան Ադրբեջանին վաճառել է 71 զրահատրանսպորտ՝ առանց սպառազինության, 122 միլիմետր տրամաչափի 7 ինքնագնաց հրանոթ, Ми-24R տիպի 1 մարտական ուղղաթիռ, 3000 ինքնաձիգ և 1 հակատանկային հրթիռային արձակման սարք։
Հայաստանն Ուկրաինայից ստացել է L-39 տիպի 2 ուսումնական ինքնաթիռ՝ ռեակտիվ ավիացիայի օդաչուների համար, 230 ատրճանակ, 60 հրացան ու կարաբին, 16.500 ինքնաձիգ, 2501 թեթև գնդացիր։
Հիշեցնենք, որ Խաղաղության խնդիրների ուսումնասիրության Ստոկհոլմի ինստիտուտի (SIPRI) տվյալներով՝ սպառազինության խոշորագույն արտահանողների թվում 10-րդ տեղից 12-րդ տեղ նահանջած Ուկրաինան սպառազինություն ամենաշատը վաճառում է Ադրբեջանին, Վրաստանին և Չինաստանին:
Միայն 2004-2006 թվականներին Ադրբեջանն Ուկրաինայից գնել է Т-72 տիպի 45 տանկ: Բացի այդ, Ադրբեջանն Ուկրաինայից գնել է МИГ-29 և այլ մարտական ինքնաթիռներ, հակատանկային հրանոթներ, ականանետեր, ռեակտիվ համակարգեր և այլն:
