Էնդի Ջեսին հուլիսի 5-ին Ջեֆ Բեզոսին կփոխարինի աշխարհում խոշորագույն ինտերնետ-ռիթեյլերի՝ Amazon.com Inc-ի, գլխավոր գործադիր տնօրենի պաշտոնում: «Մենք ընտրել ենք այդ ամսաթիվը (հուլիսի 5), որովհետեւ այն հատկապես նշանակալից Է ինձ համար»,-ասել Է Բեզոսը: Նա բացատրել Է, որ ուղիղ 27 տարի առաջ՝ 1994 թվականի հենց այդ օրը, գրանցվել Է Amazon ընկերությունը:
Ղեկավարության փոխվելու մասին ընկերությունը հայտարարել Էր դեռ փետրվարի սկզբին, բայց կոնկրետ ամսաթիվը չի նշվել: 53-ամյա Ջեսին այժմ Amazon Web Services (AWS) ամպային ծառայության ղեկավարն Է: Նա ընկերությունում աշխատում Է 1997 թվականից: Բեզոսը, որը 57 տարեկան Է, կմնա ընկերության տնօրենների խորհրդի գործադիր նախագահ: Նա մտադիր Է կենտրոնանալ Amazon-ի նոր արտադրանքների վրա եւ վաղ փուլում նախաձեռնությունները մշակելու վրա:
Նաեւ նա հույս ունի, որ ինքն ավելի շատ ժամանակ կունենա ուրիշ նախագծերի՝ Day 1 Fund բարեգործական հիմնադրամի, Bezos Earth Fund բնապահպանական հիմնադրամի, Blue Origin օդատիեզերական նախագծի եւ The Washington Post թերթի համար: Amazon-ի բաժնետոմսերի գնանշումները մայիսի 26-ին աճել են 0,2 տոկոսով: Ընկերության շուկայական արժեքը վերջին տասներկու ամսվա ընթացքում ավելացել Է 36 տոկոսով եւ այժմ կազմում Է 1,64 տրիլիոն դոլար, Standard & Poor՚s 500 ֆոնդային ինդեքսն այդ ժամանակաշրջանում ավելացել Է ավելի 38 տոկոս, հաղորդել Է «Ինտերֆաքս»-ը:
