Netflix-ը, որը տարիներ առաջ հեղափոխեց հեռուստադիտման աշխարհը՝ առաջարկելով սեզոններն ամբողջությամբ՝ միանգամից դիտելու հնարավորություն, այժմ բախվում է նոր մարտահրավերի։ Bloomberg-ի տվյալների համաձայն՝ ավելի ու ավելի շատ օգտատերեր հայտնի սերիալները չեն հասցնում դիտել մինչև երկրորդ սեզոն։ Փորձագետների կարծիքով՝ դրա պատճառներից են Netflix-ի հաճախակի որոշումները՝ չշարունակելու սերիալները, ինչպես նաև սեզոնների միջև երկար դադարները։ Սակայն խնդիրը միայն Netflix-ի բովանդակությունը չէ. փոխվել է նաև մարդկանց ժամանցի ձևը։
Եթե նախկինում Netflix-ը մրցում էր ավանդական հեռուստատեսության հետ, ապա այժմ նրա հիմնական մրցակիցներն են դարձել TikTok-ը, YouTube-ը, Reels-ը և կարճ սերիալների հավելվածները։ Մարդիկ ավելի հաճախ են ընտրում կարճ տեսանյութեր, որոնք կարելի է դիտել մի քանի րոպեում։
Netflix-ը փորձում է հարմարվել նոր իրականությանը․ ընկերությունը նույնիսկ ավելացրել է TikTok-ին նմանվող լրահոս, որտեղ առաջարկվում են իր բովանդակության կարճ հատվածներ։ Սակայն մասնագետները կարծում են, որ սա դեռևս բավարար չէ, քանի որ օգտատերերը հաճախ չեն ցանկանում պարզապես ինչ-որ բան գտնել դիտելու համար, այլ ցանկանում են հենց այդ կարճ ձևաչափով սպառել բովանդակությունը։
