«Մեր իմացած բանակը պետք է լիներ տարածաշրջանի ամենամարտունակ բանակը: Իրականում կազմակերպչական առումով կարելի էր ավելի լավ վիճակ ունենալ՝ օրինակ՝ IT կոմպոնենտ չկար և այլն. ամեն մի էլեմենտ ապացուցում է, որ մեր բանակը շրջադարձային ռեֆորմի կարիք ունի, և այդ հարցը մտնում է Կառավարության հրատապ 15 կետերի մեջ»,- այս մասին «Առաջին լրատվական»,-ի հետ զրույցում ասաց էկոնոմիկայի նորանշանակ նախարար Վահան Քերոբյանը, ով պատերազմի օրերին առաջնագծում է եղել: Նրա կարծիքով՝ բանակը պետք է դառնա բաց կառույց, բանակի քննադատությունը չպետք է արգելվի, և միայն դա կարող է դառնալ մարտունակ բանակ կառուցելու երաշխիքը:
Քերոբյանի խոսքով՝ սեպտեմեբրի 26-ին որևէ մեկը չէր պատկերացնի, որ նոյեմբերի 9-ին կունենանք այս իրականությունը: Նրա խոսքով՝ կան կասկածներ, որ ՊՆ-ից եկած հրամանները չեն կատարվել ՊԲ-ի կողմից:
Այս աղետը պետք է մեզանից յուրաքանչյուրն ընկալի որպես անձնական վիրավորանք, և ամեն մեկն իր գործում պետք է վերափոխվի այնպես, որ մենք, որպես ազգ, կարողանանք դիմագրավել այն արհավիրքներին, որոնք առկա են: Զրնգուն ապտակը պետք է ծառայի որպես էներգիա մեր ազգի աճի համար: Պետք է զինվել ուժեղ տնտեսությամբ, գիտելիքներով, բանակով և դառնալ ուժեղ ազգ»,- ընդգծեց էկոնոմիկայի նախարարը:
Էկոնոմիկայի նախարարի պաշտոնում աշխատելու առաջարկը Վահան Քերոբյանը համարում է իր առաջնագծային ծառայության տրամաբանական շարունակությունը. «Այս առաջարկը ես համարել եմ բացառիկ հնարավորություն ծառայելու հայրենիքին այնտեղ, որ դրա կարիքը ամենաշատը կա»:
«Մենք պետք է մտածենք մեր ազգին թմբիրից հանելու և նորմալ կյանքի հունի մեջ մտցնելու մասին»,- նշեց նախարարը:
«Տնտեսության մեջ պետք է ներդնել «գործարար սենտիմենտի» գործակիցը, որովհետև գործարարի այսօրվա տրամադրությունից կախված է մարդկանց վաղվա բարեկեցությունը: Պետք է այնպես անենք, որ գործարարները միշտ լավ տրամադրություն ունենան, որովհետև դա իրենց ստեղծագործելու աղբյուրն է»,- նշեց Քերոբյանը:
Մանրամասները՝ տեսանյութում:
