Պատերազմը հրահրել է Ադրբեջանը: Պատերազմում ներգրավված է Թուրքիան: Պատերազմում մասնակցություն ունեն ահաբեկիչ վարձկանները: Այս երեք արձանագրումներից կբխեն կոնկրետ գործողություններ: Հուսամ՝ ԵԱՀԿ Մինսկի խմբի համանախագահները կհամոզեն այլ երկրների ևս, մասնավորապես նաև ՄԱԿ-ի Անվտանգության խորհրդի անդամներին, կատարել անհրաժեշտ քայլեր: Այս մասին «Առաջին լրատվական»-ի հետ զրույցում ասաց Երևանի մամուլի ակումբի նախագահ Բորիս Նավասարդյանը:
Նրա դիտարկմամբ՝ պատերզամի շարունակվելը ձեռնտու չէ նաև Ալիևին՝ նույնիսկ որոշակի հաջողությունների պայմաններում: «Նրա իշխանությունը որքան որ սպառնալիքի տակ էր պատերազմը չսկսելուց առաջ, այնքան էլ սպառնալիքի տակ է, եթե պատերազմը շարունակվի և Թուրքիայի ազդեցությունը Ադրբեջանում մեծանա: Եթե Էրդողանը վերահսկի քաղաքական իրավիճակը Ադրբեջանում, Ալիևը, որպես երկրի ղեկավար, որևէ հեռանկար չի ունենա:
Ալիևը կամաց-կամաց կուտակում է փաստարկներ, թե ինչու են պետք բանակցություններ, և արդեն հրաժարվում է իր նշած նախապայմաններից, որ Արցախից հայկական ուժերի դուրսբերումից հետո միայն կնստի բանակցությունների սեղանի շուրջ: Նա զգում է, որ աթոռն իր տակ արդեն սկսում է շարժվել այլ պատճառներով, քան պատերազմ չսկսելը և հողերը չվերցնելը: Ալիևի աթոռի շարժվելը առաջին հերթին պայմանավորված է Ադրբեջանում Թուրքիայի ազդեցության մեծացման հետ»,- նշեց Նավասարդյանը:
Նա նաև հավելեց, որ Ալիևին իշխանությունից զրկելը Հայաստանի համար ձեռնտու չէ, քանի որ Թուրքիան Ադրբեջանը կարող է դարձնել ահաբեկչական տարածք: «Անկարային ադրբեջանցիների անվտանգությունը չի հետաքրքրում, նրանց հետաքրքրում է Հարավային Կովկասում ներկայություն ունենալը»,- ասաց Նավասարդյանը:
Մանրամասն՝ տեսանյութում:
