Օգոստոսյան այս շաբաթն իրադարձային էր. ինֆորմացիոն տարածքը հիմնականում զբաղեցրել էին Ամուլսարում ստեղծված լարված իրավիճակը և Բեյրութում տեղի ունեցած պայթյունը, այդ ողբերգության ծանր հետևանքներից բաժին հասավ նաև Բեյրութի հայկական համայնքին: Հայաստանը, ի թիվս այլ երկրների, ձեռք է մեկնում Լիբանանին. վաղը Հայաստանից առաջին ինքնաթիռը օգնության կմեկնի Բեյրութ: Այս և ներքաղաքական մի քանի դրվագների շուրջ «Առաջին լրատվական»-ի հետ քննարկմանը մասնակցեցին Գերագույն խորհրդի պատգամավոր Ազատ Արշակյանը, «Քաղաքացու որոշում» կուսակցության անդամ Նարեկ Ներսիսյանը և Հայ կառուցողական կուսակցության անդամ Դավիթ Հովհաննիսյանը:
Լիբանանում հետաքննությունը դիտարկում է Բեյրութի նավահանգստում տեղի ունեցած պայթյունի մի քանի վարկածներ, այդ թվում անփութությունը, դժբախտ պատահարը և արտաքին ներգործությունը:
«Երկու հայտարարություն է տարածվել՝ Իսրայելը և Հզըբոլլահը հայտարարել են, որ իրենք կապ չունեն տեղի ունեցածի հետ, և որ հարկավոր է փնտրել երրորդ ուժի. պայթյունի պատճառը կարող է լինել պատահականությունը, կարող է և ծրագրված անփութություն է եղել,- նշեց Ազատ Արշակյանը:- Մեզ համար կարևորն է այն, որ ՀՀ-ն պետք է պահուստային բնակֆոնդ և ռեսուրսներ ունենա, ճիշտ կլիներ ներգաղթ կազմակերպել, քանի որ մեր պետությունը պետք է գործիք լինի հայապահպանության համար»:
«Պետք է ունենանք պետական մասշտաբով հստակ մոտեցումներ, որոշակի ծրագրեր և ռազմավարություն, թե նման դեպքերում ինչպես աշխատել Սփյուռքի հետ, ինչպես օգնել»,- նշեց Դավիթ Հովհաննիսյանը:
Անդրադառնալով Ամուլսարում օրեր շարունակ ընթացող բողոքի ակցիաներին՝ ընդդեմ Ամուլսարի հանքի շահագործման, Ազատ Արշակյանը նշեց, որ այնտեղ են բնության պահապանները և ջերմուկցիները… , բայց կա նաև ստվերային պայքար, հարմար առիթն են օգտագործում, տեսնում ենք, որ ԱՄՆ բիզնեսը վտարում են Հայաստանից: Շատ հնարավոր է, որ այս շարժումը դառնա հակաեվրազիական շարժում… Եվ շատ հնարավոր է, որ քաղաքական դիվիդենտներ շահեն այն քաղաքական ուժերը, որոնք դեմ են Հայաստանում հումքահանքային կոնցեպցիային»:
«Ամուլսարի հարցում իշխանությունը քար լռություն է պահպանում,- ընդգծեց Դավիթ Հովհաննիսյանը:- Իշխանության կողմից ջայլամային քաղաքականություն է… Ամուլսարում կա չգնահատված ուրան, որը եթե բացվի, աղետ կլինի, դա ազգային անվտանգության խնդիր է»:
Քննարկման մասնակիցների դիտարկմամբ՝ իշխանությանը չի հետաքրքրում բնապահպանական հարցը:
Մանրամասն՝ տեսանյութում:
