Կորոնավիրուսը աշխարհի ապագայի մասին խորհելու առիթ է տվել, որն օգտագործում են ամենատարբեր շրջանակներ՝ տալով նոր աշխարհի վերաբերյալ իրենց պատկերացումների շարադրմամբ՝ հանրային մտորումների մեծ առիթ: Դեռևս հնարավորություն կլինի գնահատել, թե ի վերջո ինչպիսի աշխարհի հետ ենք գործ ունենալու: Առայժմ միակ որոշակի բանն անորոշությունն է:
Թեմայի շուրջ «Առաջին լրատվական»-ի հետ քննարկմանը մասնակցեցին սոցիոլոգ Արտակ Սաղաթելյանը, վերլուծաբան Գոռ Մադոյանը և կառավարման հարցերի փորձագետ Կարեն Սարգսյանը:
Արտակ Սաղաթելյանի դիտարկմամբ՝ գլոբալ երկու խնդիր է առկա՝ առողջապահության խնդիրը և տնտեսության. «Առողջապահության առումով աշխարհում արդեն տրվել է ձևակերպումը՝ համաճարակը պետք է կարողանալ պահել այնպիսի սահմաններում, որ առողջապահական համակարգը կոլապսի չենթարկվի: Իսկ տնտեսության առումով գլոբալ խնդիրն անորոշությունն է: Ինչպես վարչապետը նկատեց՝ հայտնի չէ՝ այս վիճակը կտևի 2-3 շաբաթ, թե մեկ կամ ավելի տարի»: Սոցիոլոգի կարծիքով՝ միայն Չինաստանի առումով կարելի է կանխատեսում անել, որ այս ամեն ինչից բարեհաջող է դուրս գալիս և հնարավոր է նաև տնտեսական օգուտներով: «Շատ պետություններ անպատրաստ են: Մեր երկիրը միջանկյալ դիրքում է գտնվում, մեր կառավարությունը բաց ու թափանցիկ է աշխատում, կարևորը՝ մահվան դեպքեր չունենք»,- նշեց սոցիոլոգը:
Կարեն Սարգսյանն անդրադառնալով հարցին, թե իշխանությունը և հասարակությունն ինչպես արձագանքեցին համաճարակին, նշեց. «Իշխանության արձագանքն արդյունավետ էր, թե ոչ, դա կերևա արդյունքներից, երբ հնարավոր կլինի չափել համաճարակի ազդեցությունը: Կարճաժամկետ առումով գնահատելով՝ հաշվի առնելով կոմպետենտությունը, արագ արձագանքելը, թափանցիկությունը և հաշվետվողականությունը, կարելի է արդյունավետ համարել իշխանության արձագանքը: Հետաքրքիր է նաև հասարակության արձագանքը. ինքնակազմակերպվեցին շատ խմբեր և աջակցության ձեռք մեկնեցին. սա մեր ժողովրդի բացառիկ հատկություններից է»:
Քննարկման մասնակիցների կարծիքով՝ առաջիկայում կառերեսվենք սոցիալական բարդ խնդիրների հետ:
Մանրամասն՝ տեսանյութում:
