Պրահայում Pod kaštany հրապարակը («Շագանակենիների տակ»), որտեղ գտնվում է Չեխիայում Ռուսաստանի դեսպանատունը, կանվանակոչվի Բորիս Նեմցովի անունով: Այս մասին հայտնում է «ՌԻԱ Նովոստին»՝ քաղաքապետարանի մամուլի ծառայությանը հղումով:
Նշվում է, որ քաղաքային խորհուրդը համապատասխան որոշում է կայացրել քաղաքական գործչի մահվան հինգերորդ տարելիցի նախօրեին: «Ռուսաստանցի հայտնի քաղաքական գործիչ Բորիս Նեմցովի սպանության հինգերորդ տարելիցի կապակցությամբ Պրահայի քաղաքային խորհրդի անդամներն այսօր (…) հրապարակը նրա անունով անվանակոչելու որոշում կայացրին: Այս որոշումը կայացվել է Պրահայի 4500 բնակիչների կողմից ստորագրված համապատասխան միջնորդության շրջանակում»,- ասված է մամուլի ծառայության հաղորդագրության մեջ:
Հրապարակի նոր անունով ցուցատախտակի բացման արարողությունը տեղի կունենա փետրվարի 27-ին:
2018 թ.-ի փետրվարի 27-ին Բորիս Նեմցովի անունով (Boris Nemtsov Plaza) հրապարակ է հայտնվել Վաշինգտոնում: Այն գտնվում է Ռուսաստանի դեսպանատան գլխավոր մուտքի դիմաց:
