Մարտի 15-ին Արմավիրի մարզի երեք համայնքներում՝ Արշալույսում, Արագածում և Շահումյանում նշանակված տեղական ինքնակառավարման մարմինների ընտրությունները չեն կայանալու։ Ընտրությունների վերաբերյալ տեղեկատվությունը Կենտրոնական ընտրական հանձնաժողովի կայքից հանվել է: Մարտի 15-ին ընտրություններ կկայանան միայն 4 համայնքում։
Պարզվում է՝ Արմավիրի մարզպետ Համբարձում Մաթևոսյանը ուժը կորցրած է ճանաչել 2019 թվականի դեկտեմբերի 24-ին կայացված իր որոշումը, որով մարզի նշված երեք համայնքներում համայնքի ղեկավարի հերթական ընտրություններ էին նշանակվել։
Արմավիրի մարզպետ Համբարձում Մաթևոսյանն ասաց, որ որոշումը չեղարկվել է այն պատճառով, որ իրավական առումով հնարավոր չէր նույն համայնքներում երկու ընտրություն կազմակերպել։ Բանն այն է,որ հունիս ամսին այդ համայնքներում նախատեսված է միավորման գործընթաց, համայնքների միավորման ընտրությունները նախատեսված են հունիսի 15-ին։ Հետևաբար, ըստ մարզպետի, տրամաբանական չէ, նախ, մարտին անտեղի գումար ծախսել համայնքի ղեկավարի ընտրությունների համար, ապա երկու ամիս կրկին ընտրություն կազմակերպել արդեն միավորման համար։ «Այս որոշումը ֆինանսական միջոցները ճիշտ կառավարելու և իրավական դաշտում մնալու որոշում է»,- ասաց Համբարձում Մաթևոսյանը։
Մարզպետը նշեց, որ դեռ հայտնի չէ՝ տեղական հանրաքվե համայնքների միավորման հետ կապված լինելու է, թե ոչ, թե միանգամից ընտրություն է լինելու։ «Եթե ցանկություն կա՝ հանրաքվեի գործընթաց կարող են կազմակերպել տեղական ինքնակառավարման մարմինները։ Դրա համար էլ պետք է մեծամասնության համաձայնությունը լինի։ Բայց ես համայնքների ղեկավարների հետ հանդիպում եմ ունեցել և հասկանալի էր, որ համայնքի բնակիչները թերի տեղեկացված են միավորման գործընթացի հետ կապված։ Բայց համայնքի ղեկավարների հետ հանդիպման ժամանակ հասկացա, որ որևէ պատճառ չկա, որ համայնքների միավորման գործընթացը տեղի չունենա»,- ընդգծեց Համբարձում Մաթևոսյանը։
Նշենք, որ Արմավիրի մարզի նշված երեք համայնքներից ամենաինտրիգային ընտրությունը սպասվում էր Արշալույս համայնքում, որի ղեկավարը գեներալ Մանվել Գրիգորյանի եղբորորդին է՝ Զարզանդ Գրիգորյանը, որի հրաժարականի պահանջով ամիսներ շարունակ բողոքի ակցիաներ էին տեղի ունենում և, ի վերջո, հարուցվեց քրեական գործ, և համայնքապետի լիազորությունները կասեցվեցին։
Արշալույսի համայնքապետ Զարզանդ Գրիգորյանը «Առաջին լրատվական»-ի հետ զրույցում ասաց, որ համայնքների միավորման դեպքում էլ է առաջադրվելու։ «Միավորեն, չմիավորեն՝ առաջադրվելու եմ։ Բոլոր պարագայում առաջադրվելու եմ»,- ասաց նա՝ հրաժարվելով պատասխանել որևէ այլ հարցի, այդ թվում՝ կո՞ղմ է արդյոք համայնքների միավորմանը, թե՞ ոչ։
