2016թ.-ին ՀՀ ոստիկանության ՊՊԾ գունդը զավթած և մի շարք ծանր հանցագործությունների կատարման համար մեղադրվող «Սասնա ծռեր» խմբի անդամների գործով վերջին դատական նիստի ընթացքում ուշագրավ հայտարարությամբ հանդես եկավ խմբի անդամ Պավլիկ Մանուկյանը։ Մանուկյանն իր վրդովմունքը հայտնեց այն մասին, որ Արմեն Բիլյանը մինչ այժմ գտնվում է անազատության մեջ. «Երբևէ չեմ վախեցել ապստամբելուց, մեռնելուց և ճիշտն ասելուց։ Հիմա էլ եմ ասում՝ եթե պետք լինի, եթե այս իշխանությունները շարունակեն նախորդի սրիկա գործելաոճը, ես էլի կմնամ նույն ապստամբը»: Մեղադրյալ Արմեն Բիլյանն էլ իր հերթին հայտարարեց՝ եթե պետք լինի, եթե ժողովրդին նեղացնեն, ինքն էլի կապստամբի:
Հայաստանում տեղի ունեցած թավշյա հեղափոխությունից հետո «Սասնա ծռերը» հանդես եկավ հայտարարությամբ՝ զինված պայքարի էջը փակելու և քաղաքական դաշտում գործունեություն ծավալելու մասին։ Կուսակցությունն անգամ մասնակցեց 2018 թվականի դեկտեմբերին կայացած արտահերթ խորհրդարանական ընտրություններին, սակայն չկարողացավ հաղթահարել անցողիկ շեմը։
Ի՞նչ է նշանակում նորից ապստամբելու այս հայտարարությունը, արդյոք այն պարագայում, երբ իշխանությունները կգնան այնպիսի մի քայլի, որը կհակասի «Սասնա ծռերի» համոզմունքներին, մենք այս անգա՞մ էլ կտեսնենք զինված ապստամբություն Նիկոլ Փաշինյանի իշխանության դեմ։
«Սասնա ծռեր» համահայկական կուսակցության քարտուղարության անդամ, կուսակցության մամլո խոսնակ Վահագն Ավագյանն «Առաջին լրատվական»-ի հետ զրույցում անդրադառնալով այս հայտարարություններին՝ նշեց. «Սա չենք կարող դիտարկել որպես կուսակցության կարծիք։ Մենք մեր դիրքորոշումը վաղուց հայտնել ենք զինված պայքարի մասին։ Մենք հայտարարել ենք, որ զինված պայքարի փուլը փակված է, ունենք իշխանություն, որը Մարտի 1-ի նման ժողովրդին սպանելով իշխանություն չի պահում, հետևաբար ժողովրդավարական քաղաքական գործիքներով հնարավոր է ժողովրդի կողմից իշխանության կազմումը»։
Ինչ վերաբերում է Պավել Մանուկյանի ու Բիլյանի հայտարարությանը, Ավագյանն ասաց՝ ինքը ծանոթ չէ, և իրենց հետ դա որևէ առնչություն չունի։
Քաղաքագետ Լևոն Շիրինյանը ևս հորդորեց «Սասնա ծռերին» առանձնացնել Պավլիկ Մանուկյանից։ Անդրադառնալով նրանց հայտարարություններին՝ քաղաքագետն «Առաջին լրատվական»-ի հետ զրույցում ասաց. «Պավլիկը եղել է ապստամբական խմբի մեջ, կուսակցության անդամ չէ, և իրար կապել պետք չէ։ Բայց նաև հստակ է՝ ապստամբության հիմքեր չկան։ Կա մի հստակ բան՝ ուզում են, չեն ուզում, սիրում են, թե ոչ՝ այլ հարց է։ Ես Անկախության օրը եղել եմ Գյումրիում, իմ աչքով եմ տեսել, բայց նաև դրանից դուրս՝ ամբողջ աշխարհում Նիկոլի հանդիպումները… այդ ամենը ցույց է տալիս, որ նա որպես քաղաքական գործիչ ունի լեգիտիմության ամենաբարձր աստիճաններից մեկը։ Որևէ երկրում, ով էլ լինի՝ եթե ղեկավարն ունի նման լեգիտիմություն, ժողովուրդը ճգնաժամի ժամանակ կանգնում է տվյալ ղեկավարի թիկունքին, եթե նույնիսկ նեղացած կամ դժգոհ է»։
Քաղաքագետը հավելեց. «Մնացածը երկրորդական է, իրենք խոսում են՝ իրենց իրավունքն է, բայց իրենց կուսակցության հետ կապել պետք չէ, մարգինալ են։ Ես գիտեմ, որ «Սասնա ծռերը», ինչպես ես, համառորեն պաշտպանում ենք Նիկոլ Փաշինյանին ու իր կառավարությանը։ Որոշ բաներ այնպես չէ, բայց մենք պաշտպանում ենք, և իմ կուսակցության բոլոր անդամները ինձ հետ համակարծիք են»։
Շիրինյանը հավելեց՝ անընդհատ դժվարություններ են առաջանում, բայց դրանք պետք է միասնական ուժերով հաղթահարել: «Նախկիններն ուզում են պետականաշինությունը որքան հնարավոր է դժվարացնել, նույնիսկ գործը հասցնել նրան, որ օտար միջամտություն լինի՝ դա Քոչարյան-Սերժ թիմն է, և նրանց հետ պետք չէ կապել։ Նիկոլ Փաշինյանին պետք է պաշտպանել, մենք չենք կարող շռայլություն թույլ տալ նրա դեմ ապստամբելու, կարող ենք բարեկամական խորհուրդներ տալ, բայց հիմա երկրում այդ վիճակը չէ»,- եզրափակեց նա։
