Հուլիսին մակրոտնտեսական ցուցանիշների աճ է գրանցվել տնտեսության հիմնական ուղղություններում: «Ընդհանուր առմամբ՝ տնտեսական աճի միտում կա: Իմ կարծիքով՝ տնտեսական աճը 4-5 տոկոսի սահմաններում է… Հարկերի աճն ակնհայտ է. տնտեսվարողներն ավելի շատ են վճարում հիմա, քան առաջ»,- «Առաջին լրատվական»-ի հետ զրույցում այս մասին ասաց նախկին փոխվարչապետ, տնտեսագիտության դոկտոր Վաչե Գաբրիելյանը: Նրա գնահատմամբ՝ մոտակա տարիներին 5,5-6 տոկոս տնտեսական կայուն աճ ակնկալելը լավատեսական մոտեցում է. «Եթե կառուցվածքային քայլեր արվեն, որոնցով որոշակի քաղաքականություններ ամրագրվեն և դրանք էական ազդեցություն ունենան, միգուցե ավելի մեծ տնտեսական աճ կունենանք»:
Հարցին՝ Հայաստանի քաղաքական իշխանությունը որոշի՞չ դեր է կատարել մեր տնտեսական համակարգի ձևավորման գործում, Վ. Գաբրիելայնը նշեց. «Դժվար է միանշանակ այդպես ասել, որովհետև ամեն դեպքում կան տեխնոլոգիաներ և արտադրողականություն, և եթե մարդկային կամ տեխնոլոգիական կապիտալը հնարվորություն չի տալիս որևէ բան անելու, ապա քաղաքական իշխանությունները կարող են որոշակի չափով ազդել, եղածը վերաբաշխել և այլն… Քաղաքական իշխանության ներկայացուցիչներից մեծ մասն ունեցել է անմիջական ներգրավվածություն տնտեսական համակարգում, մի մասը չի ունեցել, և մի քանի ներկայացուցիչ շատ ավելի մեծ ազդեցություն են ունեցել, քան մյուսները»:
Անդրադառնալով Ֆինանսական շուկայում քաղաքական էլիտայի ներգրավվածության խնդրին, մասնավորապես հանքարդյունաբերության ոլորտում լիցենզիաների տրամադրմանը և ընդերքի շահագործմանը, Վ. Գաբրիելյանը նշեց. «Խնդիրներ կան կապված հանքերի շահագործման թույլտվությունների տրամադրման հետ, բայց նաև բավականին շատ քայլեր են արվել, որպեսզի այս ոլորտում ֆինանսական թափանցիկություն լինի, և հանրությունը կարողանա տեղեկատվություն ստանալ եկամուտների մասին…»:
Վ. Գաբրիելյանի դիտարկմամբ՝ դեռևս նկատելի չեն ներդրումային միջավայրի բարելավման միտումներ. «Մի կողմից կա հավատ, կան տպավորություններ, որ ինչ-որ բան փոխվել է, բայց մյուս կողմից՝ էական փոփոխություններ՝ կապված նոր շուկաների, նոր տեխնոլոգիաների և հարկային արտոնությունների հետ, չեն արվել:
Խոշոր բիզնեսի համար էական նշանակություն ունի, թե Ամուլսարի խնդրին ինչ լուծում կտրվի: Եթե հատկապես չշահագործման հիմնավորումներ չլինեն, ապա դա էականորեն կազդի ներդրումային իրավիճակի վրա»:
Մանրամասն՝ տեսանյութում:
