Այսօր՝ հունիսի 21-ին, հրավիրվել է Ազգային ժողովի արտահերթ նիստ: Այժմ քննարկվում է Բարձրագույն դատական խորհրդի անդամի ընտրության հարցը: «Իմ քայլը» խմբակցությունը ԲԴԽ անդամի թեկնածու է առաջադրել Վիգեն Քոչարյանին:
«Վեթինգը առաջատար դիրքեր է գրավում մեր լեզվամշակույթում. բոլորը դրանից են խոսում, բայց երբ փորձում ես հասկանալ, բայց թե վեթինգը Հայաստանում ինչ գործիքներով է իրականացվելու՝ ոչ ոքից չկարողացանք ստանալ»,- հայտարարեց «Բարգավաճ Հայաստան» խմբակցության պատգամավոր Նաիրա Զոհրաբյանը:
Նաիրա Զոհրաբյանը եզրակացրեց. «Այդ նախագիծը գրվում է այնտեղ, որտեղից մենք ակնկալում ենք ստանալ այն գումարները, որոնք պիտի տրվեն դատավորներին, որպեսզի նրանք այլևս չլինեն կաշառակեր: Վեթինգի նախագիծը առնվազն այս շենքում չի գրվում»:
Նրա խոսքով՝ անչափ կարևոր է փոխել այլասերված դատաիրավական համակարգը. «Բայց կարևոր է նաև, թե ինչ գործիքներով է դա փոխվելու: Եթե լինելու են քաղաքական նրբերանգներ, ապա ունենալու ենք շատ վատ արդյունք՝ ինչպես Ռուանդայում, որտեղ ներքին ցեղասպանություն և քաղաքական վենդետաներ էին իրականացվում»:
«Պարոն Քոչարյան, գոնե դուք պետք է ունենայիք այդ վիժընը, գործիքակազմը: Ես չեմ ուզում ունենալ դատավորներ, որոնց ականջներում դրված է նախագահականի կամ կառավարության հետ կապված ժուչոկ: Բայց ես չեմ ուզում, որ այդ վեթինը վերածվի վհուկների որսի: Մենք վեթինգ բառը դրել ենք պատվանդանի վրա, ու բոլորը դրանից իրենց փրկությունն են սպասում»,- նշեց պատգամավորը:
Դիմելով թեկնածուին՝ Նաիրա Զոհրաբյանն ասաց. «Դուք վատ պատմություններում չեք նկատվել, բայց արդյոք դա բավարա՞ր է»:
Մանրամասները՝ տեսանյութում:
