«Ազգային անվտանգություն» կուսակցության նախագահ, Սերժ Սարգսյանի՝ Ազգային ժողովում նախկին պաշտոնական ներկայացուցիչ Գառնիկ Իսագուլյանը առաջիններից էր, ով հայտարարեց, թե պատրաստ է ընդունելու ԲՀԿ առաջնորդ Գագիկ Ծառուկյանի՝ կոնսոլիդացվելու առաջարկը: «Առաջին լրատվական»-նն այս կապակցությամբ մի քանի հարց ուղեց Գ․ Իսագուլյանին:
– Պարոն Իսագուլյան, Դուք առաջինը հայտարարեցիք «Բարգավաճ Հայաստան» կուսակցության հետ կոնսոլիդացվելու մասին, մինչև հիմա Ձեզ հանդիպման հրավեր չի՞ եղել: Խորհրդարանական ուժերից երկուսի հետ արդեն հանդիպում-քննարկում է եղել:
– Ես կարծում եմ, որ շուտով այդ հանդիպումը տեղի կունենա: Մենք ողջունել ենք այդ նախաձեռնությունը, մեզ համար հատկապես ընդունելի էր յոթերորդ համագումարում ԲՀԿ առաջնորդի ելույթը, այնտեղ մատնանշած կետերը: Սա այն դեպքն է, երբ գործարարը փորձում է ինքնուրույն դրսևորվել՝ շատ կարևոր երևույթ է հայաստանյան իրականության մեջ, որովհետև բոլոր գործարար շրջանակները միշտ վախեցել են, որ եթե իշխանության հետ կապված որևէ խնդիր, նոր ծրագիր, նոր գաղափար ասեն, ապա իշխանությունն անպայման իր գործողությունները կսկսի:
Այդ առումով երբ նա համարձակություն ուենցավ այդ մասին հստակ ասելու և գնաց այս միավորման քայլերին, որտեղ նա, ըստ էության որոշիչ, կենտրոնական դեր է ստանձնել, դա խոսում է այն մասին, որ նրանք շատ լուրջ են տրամադրված, և դա շատ ողջունելի է: Այսինքն՝ կրկնակի բան է տեղի ունեցել՝ ոչ միայն ոչ իշխանական ուժերն են միավորվել, այլ նաև գործարար աշխարհին ցույց է տրվում , որ նրանք իշխանությունից չպետք է վախենան, որովհետև նրանցից շատերն էլ են հոգնել այս վիճակից և նրանք էլ են սպասում նոր իրավիճակի:
Հավատացեք, գործարարը կուզենար, որ ինքը հանգիստ կարողանար իր գործունեությունը ծավալել և չխառնվել քաղաքականությանը: Հիմա շատերը մանդատ ինչի՞ համար են ուզու՝ որ կարողանան ապահովագրել իրենց գործարար գործունեությունը։ Երբ գործարարն ինքնուրույն է, անկախ է, և իր գործունեությունը օրենքի շրջանակներում է, որևէ մեկից կախում և վախ չունի, բնականաբար իր գործունեությունն ավելի նպաստավոր է, և ոչ մի իշխանափոխություն իր համար անընդունելի ու անընկնալելի չէ: Այդ առումով բավականին դրական գործունեություն է ծավալել «Բարգավաճ Հայաստանը», և մեր աջակցությունը դրան միանշանակ է:
– Ինչ որ փուլում հնարավո՞ր է այդ նախաձեռնությանը միանա նաև երկրորդ նախագահ Ռոբերտ Քոչարյանը: Նա վերջին շրջանում կառավարությանն, օրինակ, կոշտ քննադատության ենթարկեց, ինչը և անում է այս կոնսոլիդացիան նախաձեռնողը:
– Եկեք դրանք չնույնականացնենք: Փառք Աստծո, և՛ առաջին, և՛ երկրորդ նախագահներն այն մարդիկ են, ովքեր ինքնուրույն որոշումներ կայացնելու ոչ մի խնդիր չունեն: Ես, օրինակ, կողջունեի, եթե երկուսն էլ մասնակցեին այս գործընթացներին:
– Այսինքն՝ կողջունեիք, եթե Ռոբերտ Քոչարյանն էլ մասնակցեր:
– Այո՛, և նաև Լևոն-Տեր-Պետրոսյանը, ինչի՞ մասին է խոսքը:
– Լևոն Տեր-Պետրոսյանը կա այս գործընթացներում:
– Դե դա իրենց որոշելու խնդիրն է, այս գործընթացներն իրենց հետ կապելը ճիշտ չեմ համարում: Ասել, որ նրանց աջակցությամբ, թելադրանքով կամ խորհրդով է՝ ոչ: Այս գործընթացները կոնկրետ ԲՀԿ-ի պարագայում գիտեմ, որ Գագիկ Ծառուկյանի որոշելիքն է եղել, և այդ հարցն իրենց կուսակցությունում շատ լուրջ քննարկվել է:
– Իսկ այս գործընթացը մինչև Սերժ Սարգսյանի հրաժարականի պահանջ տանելո՞ւ է:
– Նպատակը դա չէ, նպատակը նոր ծրագրեր առաջարկելն է:
– Բայց Սերժ Սարգսյանը Ձեր ներկայացրած նոր ծրագրերին կհամաձայնի՞։
– Դե հիմա, դա արդեն իրենց պետք է հարցնեք․․․Ես կարծում եմ, որ գործընթացներն այն վիճակում են, որ նախագահն ինքը շահագրգռված լինի նոր ծրագրեր ու մոտեցումներ լսելու:
– Այսինքն՝ Ձեր նոր ծրագրերով Սերժ Սարգսյանի հետ եք աշխատելո՞ւ։
-Ես այդպիսի բան չեմ ասում, ես ինքս որոշում չեմ կայացրել, ես չգիտեմ՝ այդ միավորումն ինչի կբերի, բայց չեմ կարծում, թե գերխնդիրը Սերժ Սարգսյանի հրաժարականը պահանջելն է:
