Աստղագետները ավելի քան մեկ տասնամյակ տևած տիեզերական «պահմտոցիից» հետո հայտնաբերել են երիտասարդ աստղի շուրջ պտտվող մոլորակ։
Հայտնագործությունն առանձնահատուկ է նաև նրանով, որ անցյալ տարվա վերջին միմյանցից անկախ աշխատող երկու գիտական խմբեր, ընդամենը մի քանի օրվա տարբերությամբ և տարբեր աստղադիտակների օգնությամբ, հայտնաբերել են նույն սառը գազային հսկա մոլորակը։ Գիտնականների խոսքով՝ սա Երկրից երբևէ ուղղակիորեն պատկերված ամենաաղոտ մոլորակն է։
Շոտլանդացի և գերմանացի գիտնականների համատեղ թիմը մոլորակը հայտնաբերել է Բետա Պիկտորիս (Beta Pictoris) աստղի շուրջ՝ օգտագործելով Չիլիում գտնվող Եվրոպական հարավային աստղադիտարանի Շատ մեծ աստղադիտակը (Very Large Telescope)։ Այնուհետև հետազոտողները ուսումնասիրել են արխիվային տվյալները՝ մոլորակի ուղեծիրը հաստատելու համար։ Պարզվել է, որ այն տարիներ շարունակ աննկատ էր մնացել, քանի որ «կորչում» էր իր զգալիորեն ավելի պայծառ մայր աստղի և հարևան երկու մոլորակների ֆոնին։
«Սա իսկապես նման էր 11 տարի տևած պահմտոցի խաղի»,ժ ասել է հետազոտության համաղեկավար, Եվրոպական հարավային աստղադիտարանի ներկայացուցիչ Մարկուս Բոնսենը։
Միևնույն ժամանակ, Կալիֆոռնիայի գիտնականների խումբը նույն մոլորակը հայտնաբերել է ՆԱՍԱ-ի «Ջեյմս Ուեբ» (James Webb) տիեզերական աստղադիտակի օգնությամբ։ Դրա համար բավարար է եղել ընդամենը երկու դիտարկում։ «Ջեյմս Ուեբը» տիեզերք արձակված ամենամեծ և ամենահզոր աստղադիտակն է։
Երկու հետազոտական խմբերն էլ իրենց արդյունքները հրապարակել են «The Astrophysical Journal Letters» գիտական ամսագրում։
Գիտնականների խոսքով՝ հայտնագործությունը եղել է պատահական։ Երկու թիմերն էլ ուսումնասիրում էին Բետա Պիկտորիս համակարգի արդեն հայտնի մոլորակներից մեկը, երբ նկատել են ավելի փոքր զանգված ունեցող մեկ այլ մոլորակ, որը գտնվում էր ավելի հեռու և շուրջ 100 անգամ ավելի աղոտ էր։ Հետազոտության ընթացքում խմբերը միտումնավոր չեն կիսվել միմյանց հետ իրենց արդյունքներով, որպեսզի ապահովեն ուսումնասիրությունների անկախությունն ու եզրակացությունների անկողմնակալությունը։
